Миялы – Сағыз тасжолына көпір салынып, тасқын судан бүлінген екі көпір қалыпқа келтіріліп, автожолдың 4 шақырымы жаңартылуда.
– Миялы-Жангелдин ауылын жалғап тұрған «Кенен» көпірінің тұсына екі жыл бұрын су келіп, тас жолды жырып өтті. Ал, көктемгі тасқын кезінде су екпіні трассадағы екі көпірге де залал келтірді. Жырылған тас жолға көпір салу жобасы қаралып, «Атырауинжстрой» мердігер мекемесіне берілді. Бүгінде 54,2 метр болатын көпір құрылысын жүргізу үшін жалпы ұзындығы 16 метр, 132 дана қада қағылып, су құрғату және топырақ төсеу жұмыстары жүруде, – деді облыстық жолаушылар көлігі және автомобиль жолдары басқармасының бөлім басшысы Нұржау Маратов.
Бұдан бөлек, «Ассана Дорстрой» мекемесімен 45 шақырымды құрайтын 4-санаттағы «Миялы-Тайсойған» автокөлік жолының құрылысы жалғасуда. Қазір 21 шақырымына қиыршық тас-құм қоспасы себіліп, қыркүйек айында асфальт жабындысын төсеу жұмыстары басталады.
Аталған жұмыстар жыл соңына дейін аяқталады деп күтілуде.
