Астана қалалық №4 емханасында «Пациент – серіктес» бағдарламасының тұсаукесері өтті. Жоба Денсаулық сақтау сапасы жөніндегі аккредитация орталығы (АСQH) мен «Дом» қоғамдық бірлестігінің бастамасымен жүзеге асуда.
Бұл – Орталық Азиядағы алғашқы бастама, ол пациенттерді медициналық көмектің сапасы мен қауіпсіздігі мәселелерінде толыққанды серіктеске айналдырады.
Бағдарлама 8 қыркүйекте қол қойылған пациент-серіктестер кеңесін құру жөніндегі меморандум аясында іске асырылуда. Кеңес азаматтарды медициналық ұйымдарды аккредитациялау мен олардың жұмысын бақылау процесіне тартатын ұлттық алаңға айналмақ. Бастамаға мемлекеттік органдар да қолдау білдірді.
«Басты мақсат – тек шағымдарды тіркеу емес, пациенттер мен медициналық ұйымдар арасында тұрақты диалог орнату. Бұл өзара сенімді нығайтып, көмек сапасы мен қауіпсіздігіне тікелей әсер ететін процестерге адамдарды тартуға мүмкіндік береді», – деді жиын модераторы.
Бағдарлама халықаралық ұсынымдарға толық сәйкес келеді және мемлекет тарапынан қолдау тапты.
Презентацияға Парламент депутаттары мен Тәжікстаннан келген делегация қатысты. Шара бүкіл Қазақстанға онлайн көрсетілді.
«Біз медициналық ұйымдар арасында челлендж бастаймыз. Оның мақсаты – пациенттерді проблемаларды талқылауға тарту және бірге шағымдар санын азайту. Сараптама көрсеткендей, шағымдардың 80%-ы дәрігерлерге емес, ұйымдастыру мәселелеріне байланысты. Біз тек пациенттерді ғана емес, медицина қызметкерлерін де қорғауымыз керек, – деді АСQH басқарма төрайымы Ботагөз Қаупбаева.
Нағашыбай ҚАБЫЛБЕК
