«AMANAT» партиясы Батыс Қазақстан облыстық филиалы жанынан құрылған «Жер аманаты» комиссиясы жер мәселесіне қатысты жұмыстарды зерделеп келеді.
Бұл туралы филиалдың баспасөз қызметі хабарлады. Жалпы «AMANAT» партиясы Мемлекет басшысының тапсырмасы аясындағы пайдаланылмаған және заңсыз берілген ауыл шаруашылығы жерлерін мемлекеттік меншікке қайтару бойынша мәселелерді шешуге алғашқылардың бірі болып қосылды. «Жер аманаты» комиссиялары да 2022 жылдың маусым айынан бастап осы мақсатта барлық филиалдар жанынан құрыла бастаған.
Батыс Қазақстанда құрылған комиссияның араласуымен 2022 жылдан бастап күні бүгінге дейінгі 2,5 жыл ішінде ауыл шаруашылық саласындағы заңсыз берілген немесе пайдаланылмай жатқан 387 мың гектар жер мемлекет меншігіне қайтарылған. Соның ішінде қайта конкурсқа түсіру арқылы шаруа қожалықтарына кері пайдалануға берілген жер көлемі 95 мың гектардан асады. Оның ауыл маңындағысы, яғни ауыл тұрғындарына жайылымдық негізде пайдалануға берілген жер көлемі – 6 мың гектар.
Жалпы, жер мәселесінен туындайтын қиындықтар, шешімін күтіп отырған мәселелер қатары аз емес, халықтың сұранысы әлі де болса көп. Өйткені, мал басы жыл сайын өсіп келе жатыр. Соған сәйкес жайылымдықпен, мал азығын дайындау үшін арнайы шабындық жерлермен халықты қамту – күн тәртібіндегі бірінші мәселе. Жергілікті әкімдіктермен бірлесе отырып, комиссия мүшелері әлі де болса тыңғылықты жұмыстарды атқаруы керек.
Ләззат ҚАЖЫМОВА
Батыс Қазақстан облысы
