Астана қаласы әкімдігінің 2024 жылғы 2 ақпандағы № 511-315 қаулысына сәйкес елорданың 11 білім ордасына тарихи тұлғалардың есімі берілді. Осы қаулы арқылы:
№ 20 орта мектепке аты аңызға айналған мәдениет қайраткері, әйгілі актер, режиссер, КСРО халық әртісі Шәкен Аймановтың;
№ 24 орта мектепке көрнекті жазушы, драматург, аудармашы, публицист, қазақ әдебиетінің белді өкілі Жүсіпбек Аймауытұлының;
№ 27 мектеп-лицейге Халық қаһарманы, әйгілі партизан жазушы Қасым Қайсеновтың;
№ 34 мектеп-лицейге көрнекті мемлекет және қоғам қайраткері, ағартушы, публицист, шығыстанушы, қазақтың алғашқы Конституциясының авторы Барлыбек Сырттанұлының;
№ 38 мектеп-лицейге Алаш қозғалысының белді өкілі, ғалым, математик Әлімхан Ермековтың;
№ 44 орта мектепке Халық қаһарманы, Рейхстагқа жеңіс туын тіккен батыр Рақымжан Қошқарбаевтың;
№ 59 мектеп-лицейге академик, биология ғылымдарының докторы, Қазақ КСР ғылым академиясының корреспондент мүшесі Кәрім Мыңбаевтың;
№ 63 мектеп-гимназияға Қазақстанның халық жазушысы, көрнекті мемлекет және қоғам қайраткері Шерхан Мұртазаның;
№ 64 мектеп-лицейге көрнекті мемлекет және қоғам қайраткері, публицист, ақын, аудармашы Сұлтанбек Қожанұлының;
№ 89 мектеп-лицейге көрнекті ақын, жырау, сатирик, ағартушы Дулат Бабатайұлының;
№ 94 мектеп-гимназияға әдебиетші-ғалым, сыншы, филология ғылымдарының докторы, профессор Тұрсынбек Кәкішұлының аты берілді.
Бұл қаулыға қол қойылғанға дейін аталған ұсыныс қалалық және республикалық ономастика комиссияларында, қоғамдық кеңес пен қалалық мәслихаттың отырыстарында қызу талқыланып, қолдау тапты.
Құтты болсын дейміз.
