Аралас жекпе-жек: Арман Әшімов қарсыласын нокаутқа жіберді

Алматыда аралас жекпе-жектен Naiza Fighting Championship 34 турнирі өтті. Турнирдің басты жаңалығы «M1 Global-дың» бұрынғы чемпионы Арман Әшімовтің октагонға қайта шығуы болды. Қазақстандық аралас жекпе жек шебері бірінші раундта әзірбайжандық Серхан Валилиді нокаутқа жіберді. Осылайша,Арман екі жылдық үзілістен кейін ММА-ға жеңіспен оралды. Кештің басты жекпе-жегінде Ресейдің атынан өнер көрсететін қандасымыз Серік Разғалиев қырғызстандық Бекзат Исаковты бірінші раундта ұтты. Сонымен қатар қазақстандық Мурад Абдурахманов та айқын басымдылықпен жеңіске жетті. Ол украиналық қарсыласы Станислав Шаболтасты 15 секундта нокаутқа түсірді. Тағы бір жерлесіміз Шыңғыс Қайранов төрешілер шешімімен тәжікстандық спортшы Асадулла Рустамовтан басым болды.