Сербия астанасы Белград қаласында мәресіне жеткен бокстан әлем чемпионатында медальдар саны жөнінен Қазақстан құрамасы ІІ орынды еншіледі. Мемлекет басшысы Қасым-Жомарт Тоқаев бокстан әлем чемпионатының жүлдегерлерін толағай табыстарымен құттықтады. Жалпы әлем чемпионатында ел құрамасы бес медаль олжалады. Олардың арасынан Теміртас Жүсіпов (48 келі), Сәкен Бибосынов (51 келі) – алтыннан алқа тақса, Махмуд Сабырхан (54 келі) мен Серік Теміржанов (57 келі) – күміс, Абылайхан Жүсіпов (67 келі) – қола медаль алды. Жалпыкомандалық есеп бойынша алғашқы алтылыққа кірген құрамалар төмендегіше: І орындағы Кубаның еншісінде – 3 алтын, 1 күміс, 2 қола медаль; екінші орындағы Қазақстан еншісінде – 2 алтын, 2 күміс, 1 қола медаль; ІІІ орындағы АҚШ-тың еншісінде – 2 алтын, 2 қола медаль. Одан кейінгі орындарда: 4. Жапония – 2-0-0; 5. Ресей – 1-2-2; 6. Әзербайжан – 1-0-2; 6. Франция – 1-0-2.
Медальдардан бөлек, 2021 жылғы әлем чемпионатының жеңімпаздары AIBA-дан ауқымды ақшалай сыйақы алды: алтын үшін 100 000 доллар, күміс үшін 50 000 доллар және қола үшін 25 000 доллар. Сондай-ақ медаль алған қазақстандық боксшыларға Қазақстан бокс федерациясы: «алтынға» 70 000 доллар, «күміске» 50 000 доллар, «қолаға» 30 000 доллар табыс етті. Осылайша, 2021 жылғы әлем чемпионатының жүлдегерлері қатарына енген қазақстандық бес боксшы 595 000 доллар табыс тапты.
