Бодибилдинг: Анастасия – абсолютті чемпион!

Қазақстандық Анастасия  Щекотилова Латвияда фитнес және бодибилдингтен өткен чемпионатта әлемнің абсолютті чемпионы атанды. Латвия астанасы Ригада өткен IFBB World Fit Model Championships спорттық шара Халықаралық бодибилдинг және фитнес федерациясы демеушілігімен өтті. Алматылық Анастасия Щекотилова «Фитнес-модель» номинациясында әлемнің абсолютті чемпионы атанды. Анастасия: «Бұл әсерді сөзбен айтып жеткізе алмаймын, бәрі ойдағыдай болғанына қанағаттанамын. Жеңетініме сенімді болғаныма қарамастан, қолымнан келгеннің бәрін жасадым, жұмсаған барлық күш-жігерім бағаланды. Бұл жолғы жеңіс те ерекше, өйткені жаттықтырушым бірге болды. Бұл әрине, жеңіске жетуіме үлкен рөл атқарды», – дейді. Бойжеткен мамандығы бойынша экономист, бірақ 2019 жылдан бері фитнес-модель болуды ұйғарған. Ол бодибилдингтен Қазақстанның бірнеше дүркін чемпионы. Бапкері – Ұлпан Нұрбекова. Анастасия 2021 жылғы Қазақстан кубогының абсолютті чемпионы атағын,  Еуропа чемпионы, сонымен қатар Arnold Classic 2021 турнирінің екі дүркін және абсолютті чемпионы атақтарын жеңіп алған. Бұның алдында 2021 жылдың қыркүйегінде Испанияда өткен Arnold Classic Europe турнирінде  чемпион атанған болатын.