Бокс кеші: Екі қазақстандық жеңіске жетті

Ақтауда өткен кәсіпқой бокс кешінде қос қазақстандық боксшы жеңіске жетті. Орта салмақтағы WBC (USNBC) чемпионы қазақстандық былғары қолғап шебері Мейірім Нұрсұлтанов (14-0, 8КО) беларусь боксшысы Дмитрий Атроховпен (16-11, 7КО) жекпе-жек өткізді. Орта салмақтағы айқас 8 раундтан тұрды және ол төрешілердің шешімімен қазақстандық спортшының жеңісімен аяқталды. Осылайша Мейірім Нұрсұлтанов спорттық мансабындағы 15-ші жеңісіне қол жеткізді және осы уақытқа дейін бірде-бір рет жеңіліп көрген жоқ. Ақтаудағы кеште Бекзад Нұрдәулетов кәсіпқой бокстағы үшінші жекпе-жегін өткізді. Оның қарсыласы өзбек Фаррух Джураев (6-4-1, 2КО) болды. Жартылай ауыр салмақтағы кездесу 8 раундтан тұрды. Төрешілер жеңісті бірауыздан Нұрдәулетовке берді. Бекзад Нұрдәулетов кәсіби бокста үшінші рет жеңіске жетті. Айта кетейік, ол 2019 жылы әуесқой бокстан Әлем чемпионатында алтын медаль алған болатын. Кәсіпқой боксқа өткен жылдың қазан айында ауысты. Ақтаудағы бокс кешінде өзге де бірқатар қазақстандық боксшылар алғаш рет кәсіби рингке шықты.