Футболдан Қазақстан кубогының жартылай финалы аясында өткізілген алғашқы ойында Қарағандының «Шахтері» өз алаңында Қостанайдың «Тобыл» командасын 5:2 есебімен ойсырата ұтты. Ойын барысында қарағандылық клубтың белсенділігі айқын байқалып тұрды. Нәтижесінде олардың қатарынан бірінші кезеңде Идрис Умаев – 8, 45, Давид Атанаскоски 13 минуттарда мергендік танытса, оған 44-і минутта қостанайлық клубтан Асхат Тағыберген бір голмен жауап қайырды. Екінші кезеңде «Шахтер» сапынан Давид Мавутор 48 минутта көздеген нысанадан мүлт кеткен жоқ. Ал «Тобыл» футболшысы Игор Сергеев 58-і минутта есеп айырмасын қысқартса, 87 минутта қарағандылық Айдос Тәттібаев қорытынды есепті белгіледі. Осылайша «Шахтер» қарсыласын 5:2 есебімен тізе бүктірді. Бұл кездесуде ел футболында тұңғыш рет VAR жүйесі қолданылды. 7 қарашада елордалық «Астана» өз алаңында Алматының «Қайрат» командасын қабылдап, қонақтардан 0:3 есебімен оңбай жеңілді. Жеңімпаздар қатарынан доп соққандар: Дугалич 45+7 (0:1), Канте 67 (0:2), Шушеначев 72 (0:3). Командалар арасындағы қарымта ойындар 20 мен 21 қарашаға белгіленген. Финалдық ойын 28 қарашада өтеді.
