12 қазан күні Президент Қасым-Жомарт Тоқаев Нұр-Сұлтан қаласының әкімі Алтай Көлгіновты қабылдады. Бұл туралы шаһар басшысы өзінің әлеуметтік желідегі парақшасында хабарлады.
«Мемлекет басшысына Нұр-Сұлтанның әлеуметтік-экономикалық дамуы, қолжетімді тұрғын үй, мектептер салу, үлестік құрылыс нысандарын аяқтау, инвестициялар тарту және т.б. туралы баяндадым. Президенттің тапсырмасы бойынша қолжетімді әлеуметтік тұрғын үй құрылысының көлемі айтарлықтай ұлғайды. Мәселен 2018 жылы 1800, 2019 жылы 2900, 2020 жылы 7 мың әлеуметтік пәтер салынса, биыл бұл көрсеткішті 10 мың пәтерге дейін жеткіземіз. Сондай-ақ оқу орындары құрылысының көлемі артты. Биылғы 15 мектептің құрылысы 40 мыңға жуық оқушы орнын ашуға мүмкіндік береді. Бұл өткен жылмен салыстырғанда екі есе, ал 2019 жылмен салыстырғанда төрт есе көп. Сол сияқты ШОБ-қа жағдай жасауға, оны қолдауға, жеке инвестициялар тартуға, елдімекендерді дамытуға, газдандыруды жүргізуге ерекше назар аударып отырмыз. Осылайша, екі жылда елдімекендерде 645 км астам кварталішілік газбен жабдықтау желілері салынады. Бұдан бөлек қаладағы эпидемиологиялық жағдайды тұрақтандыру және вакцинация шаралары жайлы ақпарат бердім. Қала тұрғындарының 67%-дан астамы вакцинаның бірінші компонентін алды. Мемлекет басшысы елорданы одан әрі дамыту жөнінде бірқатар тапсырма берді», – деп жазды Алтай Сейдірұлы.
Ал Ақорда сайтында «Қасым-Жомарт Тоқаев елорданы одан әрі дамытуға, атап айтқанда газбен қамтуға, инвестиция тартуға, үлестік құрылысқа қатысты мәселелерді шешуге және жылыту маусымы барысында қазандықтардың үздіксіз жұмыс істеуіне қатысты бірқатар тапсырма берді»,– деп жазды.
