Президент Қазақстанның Әскери доктринасын бекітті

Қазақстан Республикасының Президенті Қасым-Жомарт Тоқаев Қазақстанның Әскери доктринасын бекітті. Құжатты Қорғаныс министрлігі басқа күштік құрылымдармен және мүдделі мемлекеттік органдармен бірлесіп әзірледі. Мемлекет басшысы 2021 жылғы «Халық бірлігі және жүйелі реформалар – ел өркендеуінің берік негізі» атты Жолдауында Әскери доктринаны қайта қарау қажеттігін мәлімдеген еді. Қарулы күштерді, басқа да әскерлер мен әскери құралымдарды қайта форматтау туралы бірқатар тапсырмалар берген Президент қорғаныс қабілетін нығайту, қауіп-қатерлерге ден қоюдың жеделдігін арттыру мемлекеттік маңызы бар басымдықтарға айналуға тиіс екенін атап өтті. Әскери доктринаға өзгерістер енгізу туралы жарлық заңды күшіне енді.