Маңғыстау облысы әкімінің баспасөз қызметі: «Жаңаөзенде алғаш рет дәстүрлі садақ атудан 1-і республикалық чемпионат өтіп, еліміздің үздік мергендері анықталды»,– деп хабарлайды. Чемпионатқа 200-ден астам садақшы қатысты. Ұлттық спорт түрлері қауымдастығының басшысы Исламбек Салжанов: «Дәстүрлі садақ ату соңғы 4-5 жылда ұлттық дәрежеге көтерілді. Қазір бұл спортқа мемлекет тарапынан үлкен көңіл бөлінуде. Жарысқа еліміздің көптеген облысынан кіл мықтылар келді. Біз бұл спортты әлемдік деңгейге шығаруға дайынбыз, ол үшін жан-жақты қолдау білдіреміз. Жақында Түркияда өткен көшпенділер ойынында еліміздің садақшылары 2-орын алды. Бес елдің ішінде Қазақстан 2-орын алып, 3 алтын, 2 күміс, 3 қола медальмен оралды», – деді.
Жарыс қорытындысы бойынша командалық есепте 1-орынды Шымкент қаласының мергендері жеңіп алды. Абай облысының командасы 2-орынды, Жетісу облысының мергендері 3-орынды қанағат тұтты. Сондай-ақ әр нысана бойынша жас шамасына қарай үздік мергендер анықталып, оларға да ақшалай сыйақы табысталды. Ашық аспан астында өткен спорттық шараны 2500-ге жуық көрермен тамашалауға келді.
