Таразда қалалық көпсалалы ауруханасының хирургтары асқазан-ішек жолдарының сирек патологиясымен ауыратын пациентке өмір сыйлады

Өз тәжірибесінде хирургтар әртүрлі клиникалық жағдайлармен, соның ішінде сирек кездесетін аурулармен жиі жұмыс істейді. Көп жағдайда, 0,9-5,8% адамдардың асқазан-ішектерінен жаппай қан кетудің себебі - Дьелафуа жараларының әсерінен болады. Бұл патология асқазанның шырышты қабатының тамырларының дамуындағы аномалиямен көрінетін генетикалық анықталған ауру болып саналады. Сонымен қатар, сарапшылар бұл жараларды емдеу - шұғыл хирургиялық араласуды қажет ететінін атап өтті.

Қаңтар айының басында қалалық көпсалалы ауруханасының хирургиялық бөлімшесіне Тараз қаласының тұрғыны келіп түсті. Науқастың айтуы бойынша, ол ауруханаға келерден 2-3 сағат бұрын өзін нашар сезініп, қан құсу, қара нәжіс, қатты әлсіздік, бас айналу белгілерін сезінген. Уақыт созып жүре берген соң, жағдайының нашарлауына байланысты жедел медициналық жәрдем бригадасын шақырады. Қалалық көпбейінді ауруханасының қабылдау бөлмесіне жеткізілген пациентті қараған хирург пен терапевт оны ер хирургиялық бөлімге жатқызып, медициналық талдау-сараптаудан өткізе бастайды. Нәтижесінде, шұғыл хирургиялық ота жасау жоспарланады.

Хирургия меңгерушісі Ғабиден Рахымжанның айтуынша, FGDS кезінде асқазанның кардиальды бөлімінде жара анықталған, сол жерден қан кеткен. Сондықтан, ол шұғыл түрде ашық операцияға қабылданды, яғни лапаротомиямен гастротомия жасалды. Мұндай жағдайда, асқазан толық ашылып, жараның орны тігіледі. Екі күннен кейін реанимациядағы науқаста қан кету қайталанған. Эндоскопиялық тексеру жүргізіліп, асқазан қанмен толтырылғандықтан және жағдайдың ауырлығына байланысты шұғыл түрде қайта ашық хирургия жасалынған. “Бұл процесте тағы бірнеше қан кететін жаралар табылып, олар тігілген”,- дейді эндоскопиялық хирург.

Ғ. Рахымжанның айтуынша, екінші операциядан кейін науқасқа сирек кездесетін ауру - Дьелафуа синдромы қойылған. Ол кеңес алу үшін осыдан бірнеше уақыт бұрын Таразда шеберлік сабақтарын өткізген мәскеулік әріптесі, дәрігер-гастроэнтеролог, эндоскопист, профессор Петр Щербаковқа және А. Н. Сызғанов атындағы Ұлттық ғылыми хирургия орталығының клиникалық физиология және эндоскопия бөлімінің жетекшісі Ерлан Әбдрашевке жүгінгенін айтады. Олар диагнозбен келісіп, өз ұсыныстарын айтып, бұл өте сирек кездесетін жағдай екенін айтыпты.

Төртінші күні екінші операциядан кейін науқастан қайтадан қан кете бастапты. Эндоскопиялық тексеру кезінде жалаңаш, қан кететін тамырлар табылған. Тамырлар кесіліп, қан тоқтағанымен, келесі күні қайта қарау кезінде жаңа қан тамырлары анықталған. Науқасқа екі ашық ота және екі эндоскопиялық операция жасалған соң, қан кету толығымен тоқтапты.

Клиникалық көрініс негізінде диагноз расталып(Диелафуа синдромы), профузды қан кетумен асқынған, сондай-ақ ауыр дәрежедегі постгеморрагиялық анемия да пайда болған.

Науқас 26 күн емделді. Операциядан кейінгі кезең өте ауыр болды, жан сақтау бөлімінде 13 күн болып, қан кетудің бірнеше рет қайталануы байқалған. Қан кетудің қайталанбауы үшін оған екі рет операция жасалыпты. Эндоскопиялық гемостаз бірнеше рет қайталанған. Бірінші операциядан кейінгі 13-ші күні ол хирургия бөліміне ауыстырылып, онда емдеу жоспарына сәйкес терапия алған. Емдеу аясында қан тоқтап, жағдайы жақсарыпты.

26-тәулікте қанағаттанарлық жағдайда науқас тұрғылықты жері бойынша емханада ем қабылдау үшін хирург пен гастроэнтерологтың бақылауымен үйіне шығарылды.

Дьелафуа жарасы сирек кездесетін және қауіпті жағдайлардың бірі болып табылады. Жамбыл облысында мұндай диагноз алғаш рет қойылды. Сондықтан, асқазаннан қан кетудің мүмкіндігіне шамалы күдік болса, мүмкіндігінше тезірек дәрігердің көмегін алуға тырысу қажет.

Бүгінде Тараз хирургтары асқазанға эндоскопиялық операциялардың күрделі түрлерін өздері жасай бастады.