Палестиналық «Исламдық жиһад» содырлары Газа секторындағы әскери операциясын бастағаннан бері Израильге қарай 380-нен астам зымыран атқылаған. Жиһадшылар өздерінің шабуылдарын кек алу әрекеті деп атайды екен. Израиль армиясы исламдық жиһадтың Газадағы болжамды нысандарына әуе шабуылдарын жалғастыруда. Бұл ретте ол Газадағы билеуші ХАМАС қозғалысымен ашық қақтығысқа түспей отыр. Израильдің қорғаныс министрі Бенни Ганц: «Біз лаңкестердің Газадан Израильге зымырандар мен дәлдікпен басқарылатын снарядтарды ұшыру жоспарын жүзеге асыруына жол бермедік және бұл жоспарын әлі де бұзатын боламыз. Біз Исламдық жиһадтың зымырандарын жасап, ұшыру үшін пайдаланған ондаған нысандарға соққы бердік», – дейді. Халқы тығыз орналасқан Газа секторында зымыраннан бейбіт тұрғындар көз жұмуда. Алдын ала мәлімет бойынша, әуеден жасалған соққылардан 15 адам қаза тапты, оның ішінде 5 жасар қыз бала бар. 125 палестиналық азамат жарақат алды. Израиль ақпарат құралдарының хабарлауынша, жиһадшылар елге атқылаған зымырандардың 9 пайызына «Темір күмбез» әуе қорғаныс жүйесі төтеп бере алды. Израильдің әскери операциясы бір аптаға созылатыны күтілуде. Еске салсақ, Израиль қорғаныс күштері Газа секторындағы исламшыл нысандарға әуеден соққы жасап, соның салдарынан Таяу Шығыстағы жағдай ушыға түсті. Израиль әуе шабуылдарының салдарынан 15-ке жуық содыр қаза тапты. Оның ішінде «Палестиналық исламдық жиһады» командирлерінің бірі Халед Мансұр да бар.
