Қазақстандық акробат Жанбота Алдабергенова әлем кубогы кезеңінің күміс жүлдегері атанды. Жаңа маусымды сәтті бастаған ол: «Бізде барлығы жоспармен жүріп жатыр. Жарысқа дейін үздіксіз жаттығу жасадық. Жоспарымыз – жаңа маусымдағы нәтижемізді жарыстарға бөлмей, барлық кезеңде өзімізді жоғары орындардан көрсету. Әрине ең басты мақсат – қысқы Олимпиада ойындарына жарақатсыз жету. Олимпиада жақындаған сайын спортшылар дайындығын нығайтып, шеберліктерін шыңдай түседі. Әсіресе осы жарыста қарсыластар қарқыны ерекше екені байқалды. Шынымды айтсам, әлем кубогының кезеңінде бұған дейін бірден 40 қатысушы болмаған. Биыл сан да, сапа да артқан. Олимпиада маусымына деген алғашқы қадамды нық бастық. Әрі қарай да әлем кубогының бірнеше кезеңі бар. Алдағы жарыстарда да жоғары нәтижеге қол жеткізу үшін барымды саламын. Жаз маусымында дайындаған қиындыққа секіру жаттығуларым әзір жетілдірілмеді. Ендігі бір мақсат, жаттығуларымды толықтыра түсу», – дейді.
Тағы бір қазақстандық Павел Колмаков та фристайл-могулдан әлем кубогы кезеңінің күміс жүлдегері атанды. Финляндияның Рука қаласында өтіп жатқан жарыста ерлер арасындағы сын бойынша Павел Колмаков финалда 82.10 ұпай жинап, жарысты екінші болып аяқтады. Канадалық Майкл Кингсбери топ жарса, жапониялық Юкима Хоришима үздік үштікті қорытындылады.
