Қазіргі таңда еліміздің құзырлы мекемелері қылмысқа қарсы күресті барынша күшейтіп жатыр. Бұлардың арасында интернет алаяқтарының салған лаңы оңай болмай тұр. Әдетте олардың көбі шетелдерде отырып алып, құрығын лақтыратын болса, ел ішіндегі алдамкөстерде ғаламтордың мүмкіндігін барынша пайдаланып бағуда. Солардың қатарында қызмет көрсетуді желеу етіп, өз тұтынушыларын сан соқтырып жүргендер де бар. Жақында Астана қаласы Полиция департаменті сондай бір келеңсіздікті анықтап, кінәлі тұлғаны қолға түсірді. Бұл жайында Астана қаласы Полиция департаменті Криминалдық полиция бөлімшесінің баспасөз қызметі хабарлады, әрі тұрғындарға сақ болуды ескертті. Істің мән-жайы былай басталған.
45 жастағы қала тұрғыны алаяқ-жиһаз жасаушының құрбанына айналып, ақыры полицияға алаяқтық дерегі бойынша арызданған. Әйелдің айтуынша, ол 1 миллион теңгеден астам сомаға асүй жиһазына тапсырыс берген. Жәбірленуші 200 мың теңге алдын ала төлем жасап, тапсырысын күткен, алайда күдікті не уәдесін орындамаған, не жиһазын жасамаған.
«Алматы» ауданының криминалдық полиция қызметкерлері жедел-іздестіру шаралары барысында күдіктінің жеке басын анықтады. Белгілі болғандай, ол «OLX» сайты мен «Instagram» әлеуметтік желісінде жиһаз жасайтыны туралы жарнамалар орналастырған. Тапсырыс берушілерді алдау үшін ол, оларға жалған келісімшарт жасап, жиһаз құнының 30%-ын алдын ала төлем ретінде алғаннан кейін, байланысқа шықпай, ізін суытып отырған. Күдікті өз кінәсін мойындады. Аталған дерек бойынша қылмыстық іс қозғалды. Сонымен қатар, оның үстінен бұрын тағы екі қылмыстық іс қозғалғаны анықталды. Астана қаласы Полиция департаменті елорда тұрғындары мен қонақтарын алаяқтардың айла-амалдарына түсіп қалмауға шақырады. Егер сізге қатысты заңсыз әрекеттер жасалса, 102 нөмірі арқылы полицияға дереу хабарласыңыз», – делінген таратылған ақпаратта.
