Жаман айтпай, жақсы жоқ. Бұлай деп айтып жатқанымыз сейсенбінің түнінде Алматы қаласы мен оның айналасында зілзаланың болуы. Алдымен 6 балдан жоғары жер сілкінісі болады деген болжам айтылды. 3 миллионнан аса халқы бар мегаполис тұрғындары бұған сенбеді. Бірақ Алматы қаласында зілзала болып өтті. Жер-ана екі мәрте солқ ете қалды. Бүлінген ештеңе жоқ. Қала дін аман. Осының өзі қалалықтарды айтып жеткісіз үрейге бөледі. Қала үй іштерін тастап сыртқа лап берді. Әсіресе биік-биік үйлерден түсу қалың елге оңайға соққан жоқ. Лифтідегі кептеліс, айқай-шу, жылау… жалпы тәртіпсіздік орын алды. Себебі зілзала толқыны қайта соғуы ықтимал. Көше-көшеде, үйлердің алды адамдарға толды. Әрине, қала әкімшілігі де оларға көмектесуге ұмтылды. Адамдар қорқып үйлеріне кірмеді. Аяз күшіне мініп тұрды. Амал жоқ, адамдарды мектептерге кіргізуге тура келді.
Жер сілкінісінің күші қанша болғандығы жөнінде әрқилы болжам айтылып жатты. 4,5 немесе 6,2 десті. Оның нақты нүктесі Қырғызстанда делінді. Қалай болғанда да биік үйлер теңселіп сыр берді. Егер бұдан да күшті зілзала болса ше? Онда… Әрі қарай айтудың өзі қорқынышты. Ең бастысы мұндайға біздің дайын еместігіміз. Адамдар зілзала болғанда не істеу керек? Халық осы қарапайым нәрсенің өзін білмейді. Тиісті орындар ешқандай жұмыс жүргізбеген. Алматыда осыдан 100 жыл бұрын алапат зілзала болған. Қайталануы мүмкін бе? Әбден мүмкін. Тиісті орындар осындай зілзала болатынын неге ескертпеді? Сыртқа лап берген халық қайда баруы керек? Ол да ұйымдастырылмаған. Салынған үйлердің мықтылығына ел күмәнді. Біз үй салғанда оның қанша балға шыдайтынын неге тексермейміз? Үйлер салынып жатыр. Оған жауапты кім? Міне, бұл зілзала осындай кемшіліктерімізді ашып берді. Ең бастысы адамдарымыздың өмірлерін сақтап қалу үшін зор дайындық керек екендігі мәлім болды.
