Бүгін Халықаралық инженерлік-технологиялық университетінде (МИТУ) Озық технологиялар орталығының салтанатты ашылу рәсімі өтті. Орталық қолданбалы ғылыми зерттеулерді дамытуға, технологияларды трансферттеуге және жаңа буын инженер мамандарын даярлауға бағытталған заманауи ғылыми-инновациялық алаң болып табылады.
Орталықтың құрылуы университеттің ғылыми инфрақұрылымын нығайтудың маңызды кезеңі болып саналады және жасанды интеллект, роботтандыру және экономиканы цифрландыру сияқты мемлекеттік саясаттың негізгі басымдықтарына толық сәйкес келеді.
Ашылу рәсіміне ғылыми, мемлекеттік және өндірістік салалардың жетекші өкілдері қатысты, олардың қатарында:
ҚР ҰҒА академигі, ҚР Ұлттық инженерлік академиясының президенті Жұмағұлов Бақытжан Тұрсынұлы, «Тау-Кен Самұрық» ҰК» АҚ экономика және қаржы жөніндегі бас директоры, академик Жұмағұлов Руслан Бақытжанович, Алматы қаласы Бостандық ауданы әкімінің орынбасары Кенесбай Алмаз Абаевич, МИТУ ректоры Ақпанбетов Дархан Берікұлы, сондай-ақ Global Korea Center ұйымының бас директоры Хонг Джинсун Шон болды.
Іс-шара аясында ғылыми жетістіктер көрмесі ұйымдастырылып, онда университет ғалымдары мен студенттерінің нақты өндірістік сектордың мәселелерін шешуге бағытталған өзекті әзірлемелері ұсынылды.
Негізгі жобалардың қатарында радиоактивті қалдықтар мен заттардың қауіпсіз логистикасына арналған технологиялар, экологиялық мақсаттарға бағытталған шырғанақ инновациялық сорбенттер, төтенше жағдайлар қызметіне арналған ғылыми-техникалық шешімдер, қолжетімділігі қиын аймақтарға арналған сымсыз деректер беру жүйелері, «жасыл энергетика» саласындағы жобалар (жел генераторлары мен күн панельдері), биотехнология бағытындағы әзірлемелер, соның ішінде in vitro әдісімен жоғары сапалы құлпынай көшеттерін алу және молекулалық маркерлерді қолдану, сондай-ақ нан-тоқаш өнімдерін өндіру технологиялары бар.
Ұсынылған әзірлемелер нақты ғылыми зерттеулердің нәтижесі болып табылады және қолданбалы әрі пәнаралық жобалар аясында орындалған. Олар жоғары деңгейдегі ғылыми-техникалық пысықтауды, өзіндік әдістемелердің, технологиялық шешімдердің және тәжірибелік базаның бар екенін көрсетеді. Жобалар инженерия, ақпараттық технологиялар, экология және биотехнология салаларын қамтып, өнеркәсіп пен әлеуметтік саланың нақты міндеттерін шешуге бағытталған, бұл олардың практикалық маңыздылығы мен енгізу әлеуетін айқын дәлелдейді.
Озық технологиялар орталығының ашылуы осындай ғылыми әзірлемелерді жүйелі дамытуға мүмкіндік беретін тұрақты алаң қалыптастырады. Ол ғылыми идеядан дайын технологиялық шешімге, оны енгізу мен коммерцияландыруға дейінгі толық циклді қамтамасыз етеді. Сонымен қатар, орталық заманауи технологиялармен жұмыс істей алатын, теориялық біліммен қатар практикалық дағдыларды меңгерген, экономиканың өзекті сын-қатерлеріне жауап бере алатын білікті мамандарды даярлауға ықпал етеді.
