2022 жылғы 6-7 қазанда Алматыда Қазақстан халқы Ассамблеясы Республикалық Аналар кеңесінің кеңейтілген отырысы өтті.
Іс-шараға Қазақстан халқы Ассамблеясының мүшелері, Қазақстан Республикасы Парламенті Сенаты мен Мәжілісінің депутаттары, мемлекеттік органдардың, ҚХА облыстық Аналар кеңестерінің, этномәдени бірлестіктердің және басқа да ұйымдардың өкілдері қатысты. Іс-шара барысында құттықтау сөз сөйлеген ҚР Президенті Әкімшілігі Басшысының орынбасары А.Ғ.Балаева, Аналар кеңесі «ең белсенді және маңызды қоғамдық құрылымдардың бірі және қоғам өмірінде үлкен әлеуметтік маңызы бар» деп атап өтті. Оның айтуынша, Аналар кеңесінің форумы мемлекеттік мереке – Республика күні – «тілегі мен ниеті бір мақсат жолында жүрген халқымызды біріктіретін» мереке қарсаңындағы маңызды оқиғаға айналды. А.Балаева атап өткендей, Қазақстан халқы Ассамблеясы Аналар кеңестерінің қызметі өз елінің патриоттарының жаңа буынын тәрбиелеуге бағытталған. Атап айтқанда, ол Аналар кеңесінің барлық өңірлерде жүзеге асырылып жатқан «Мәдениетті ана – Мәдениетті ұлт» республикалық жобасы – мәдениет, имандылық, мейірімділік құндылықтарын сақтау – асыл миссияның жарқын көрінісіне айналғанын еске салды. Сөз соңында А.Балаева Аналар кеңесінің жұмысы Мемлекет басшысының әділетті де өнегелі қоғамды қалыптастыру бойынша алға қойған міндеттерін жүзеге асыруға зор үлес қосатынына сенім білдірді. ҚХА Республикалық Аналар кеңесінің айрықша ерекшелігі оның тақырыптық сессияларының алуандығы болды: «Мәдениетті ана – мәдениетті ұлт» жобасының тұжырымдамасын жүзеге асыру; «Ұлттық тәрбие – мемлекеттілік негізі»; «Қауіпті келеңсіздіктер – болашаққа зиян»; «Ұлт болашағы – саналы ұрпақ»; «Тәрбие жұмысы және белсенді қоғам». Сессия барысында рухани-патриоттық тәрбие берудің өзекті мәселелері, тұлғаны қалыптастырудағы аға ұрпақтың рөлі, баланың тұлға ретінде қалыптасуындағы бұқаралық ақпарат құралдарының рөлі, отбасы мен ұрпақтар арасындағы тиімді қарым-қатынас мәселелері қарастырылды.
