Атыраулық археологтар «Ақтөбе-Лаэти» қалашығына жүргізілген қазба жұмыстары барысында сирек кездесетін көне күміс монеталар тапты. Х.Досмұхамедов атындағы Атырау университетінің археологтары анықтаған бұл монеталарды ресейлік нумизматика профессоры зерттеп, бедерлі таңбаларын оқып, жоғары бағалаған. Бұл туралы Өңірлік коммуникация қызметі хабарлады.
Ежелгі бұйым Жошы Ұлысында құрылған Алтын Орда мемлекетінің билеушісі Меңгу-Темір хан тұсында құйылған ақша тобына жатады. Белгілі нумизматик ғалым Павел Петровтың пайымдауынша, бұл тиындар ХІІІ ғасырдың екінші жартысына сәйкес келеді екен. Құйма ақшаның бір бетінде Меңгу-Темір ханның таңбалары, екінші жағында Қытай иероглифтері бейнеленген. Оның себебі Шыңғыс ханнан тараған Құбылай ұрпақтары мен Шағатай ұлысы арасында қақтығыстарда қолға түскен саяси тұтқын Номуханмен байланыстырылатын көрінеді.
Қазба жұмыстары барысында көрнекті артефакт «Тағара» ыдысы да бүтін күйінде табылған екен.
Күміс Қалтыкей
