Таяуда белгілі журналист, «Qazaqstan dauiri» ЖШС бас директоры, ел анасы Сәуле Мешітбайқызы дәстүрлі «Ел аманаты: Ауыл – ел бесігі» экспедициясы аясында Атырау облысында болды.
Ол Атырау облысының әкімі Серік Шәпкеновтың арнайы қабылдауында болып, өңірдің бүгінгі ахуалымен, ел-жұрттың тыныс-тіршілігімен танысты. Сәуле Мешітбайқызы халықаралық «Qazaqstan dauiri» газетінің «AMANAT» партиясымен, ҚР Ауыл шаруашылығы министрлігімен және «ЕлАна» қоғамдық, әлеуметтік-танымдық сайтымен, «Мөлдір бұлақ» журналымен бірлескен экспедициясының биыл «Ел аманаты: Ауыл – ел бесігі» деген атаумен жалғасын тапқанын айтты. Сондай-ақ «Qazaqstan dauiri» басылымы редакциясының бастамасымен жарыққа шыққан «Намыс қайрағы», «Ұлт шырағы» атты жаңа кітаптарды облыс басшысына тарту етті.
Содан соң Сәуле Мешітбайқызы Атырау облысының Индер ауданына жол тартты.
Еланасының басы-қасында ауылшаруашылығы басқармасының басшысы Қазбек Тәшенов пен облыстық аппарат бастығы Нұрлан Тәжібаев болып, аудан халқының әлеуметтік-экономикалық жағдайымен таныстырды. Сәуле Мешітбайқызы атқарылып жатқан игі істерді өз көзімен көріп-біліп, ел игілігі үшін қызмет атқарып жүрген басшыларға ақжарма тілегін айтып, ризашылығын білдірді.
