Дүниеде баладан асыл, сәбидің күлкісінен қымбат қазына жоқ.
Бүгінгі таңда елімізде балалардың алаңсыз білім алуына, бақытты балалық кезеңдерін өткізуге барлық жағдай жасалып келеді.
Мемлекет басшысы-Қасым Жомарт Тоқаев жас ұрпаққа жол ашу үшін барлық жағдайды жасаудың қажеттілігін айта келіп, «Балаларға ерекше назар аудару керек. Себебі, олардың амандығы – мемлекетіміздің жарқын болашағының кепілі. Өскелең ұрпақтың үйлесімді дамуы мен бақытты балалық – бұл біздің жалпыұлттық міндетіміз - деп атап көрсеткен болатын.
Бүгін ауданда балалар мерекесіне ерекше назар аударылып, жаймашуақ жаздың алғашқы күнінде алуан түрлі іс-шаралар өткізілді.
Сарысу аудандық білім бөліміне қарасты Балалар-жасөспірімдер орталығы, Балалар шығармашылығы орталығы, Жаңатас қалалық аула клубтары, өнер мектебі және аудандық кітапхананың ұйымдастыруымен Орталық саябақта мерекелік іс-шаралар өтті.
Айтулы мереке Балалар-жасөспірімдер орталығының «Балдаурен балалық шақ!» атты шарасымен басталды.
Мерекелік шараға қатысқан аудан әкімі Сәкен Мамытов аудан жұртшылығын, балаларды мерекемен құттықтады. Ерекше қуаныш пен мейірімге толы бұл шуақты мейрамның маңыздылығына, балаларға деген қамқорлық тек мереке күні ғана емес, үнемі көрсетілуі керектігіне тоқталып, жас бүлдіршіндерге зор денсаулық, баянды болашақ тіледі.
2023-2024 оқу жылындағы ауданымыздың үздік оқушылары мен олимпиада жеңімпаздарын, грант игерлері аудан әкімінің Алыс хаттарымен марапатталды.
Шара барысында балаларға концерттік бағдарламалар, қойылымдар көрсетіліп, түрлі байқаулар, мальбертке сурет салу, асфальтқа сурет салу байқауы, спорттық ойындар (гір тасын көтеру, асық ату, ләңгі тебу, эстафеталық ойындар) ұйымдастырылды. Спорттық ойындарға және сурет салу байқауына белсене қатысқан балаларға мақтау қағаздары мен сыйлықтар берілді.
Сонымен қатар, балаларға Жаңатас қалалық аула клубтары «Бақытты балалық шақ», аудандық кітапхана ұжымы «Бақытты балалар – бейбіт елдің тірегі» атты мерекелік шараларын, «Жаз. Балалар. Кітап» жобасы аясында кітап көрмесін ұсынды.
Сондай-ақ, Балалар-жасөспірімдер орталығы және Балалар шығармашылық орталығының «Балалар әлемді бейнелейді» атты балалардың қолымен жасалынған қолөнер және сурет көрмелері көрермендерге ұсынылды.
Шара барысында Жаңатас қалалық өнер мектебінің оқушылары мен домбырашылар ансамблінің өнерпаздары өз өнерлерін көрсетті.
Саябақтағы қызықты репертуарлар, персонаждар, көріністер, әртүрлі аспаптарда музыкалық композициялар балаларға қуаныш сыйлады.
Бұл қызықты да думанды шаралар балалар мен жас бүлдіршіндер үшін есте қаларлық және ұмтылмас сәттердің біріне айналары сөзсіз.
Осындай мерекелік іс-шаралар барлық ауылдық округтерде өткізіліп жатыр.
