Бүгін аудандық орталық емханасының мәжіліс залында облыстық денсаулық сақтау басқармасы бастығының орынбасары Хамит Мурзақасымовтың қатысуымен жылдық есеп беру жиыны өтті.
Басқосуда аудандық орталық ауруханасының 2021 жылдың 12 айында атқарған жұмыстарының қорытындысы зерделеніп, 2022 жылғы медициналық кеңес мүшелерін бекіту туралы күн тәртібіндегі мәселе қаралды.
Сондай-ақ орталық аурухананың құрамы мен жабдықтары, тұрғындар туралы мәліметтер, қаржыландыру бағыты, кадр құрамы, тегін дәрі-дәрмектермен қамтамасыз ету шаралары, арыз-шағымдар жайы, МӘМС жүйесінде сақтандырылмаған азаматтарды өзектендіру мәселесі, цифрландыру, медико-демографиялық станционарлық қызметтердің жұмысы, скринингтік тексерулер көрсеткіші, тууға қабілетті жастағы әйелдер бойынша өткізілген медициналық тексеру қорытындылары, екпе егу жұмыстары, денсаулық сақтау саласындағы жетістері туралы аудандық орталық ауруханасының бас дәрігерінің орынбасары Нұрмахан Мәуленов егжей-тегжейлі баяндама жасап, слайдты көпшілік назарына ұсынды.
35 ДЕНСАУЛЫҚ САҚТАУ ПУНКТІНДЕ 901 АҚ ХАЛАТТЫ ҚЫЗМЕТКЕР ЖҰМЫС ЖАСАЙДЫ
Баяндамашының айтуынша, өңірде 35 медициналық орталық бар. Оның ішінде аудандық аурухана, емхана, бастапқы медициналық санитарлық көмек көрсету орталығы, 3 фельдшерлік-акушерлік, 14 дәрігерлік аммбулаториялық, 15 медициналық пункті 86 мыңға жуық аудан тұрғынына үздіксіз қызмет көрсетеді. Медициналық техникамен жабдықтау деңгейі 2021 жылдың 12 айында 87,85 пайызды құрап отыр. Ағымдағы жылдың қыркүйек айында Халықтың тұрғылықты тіркеу порталында (ХТТ) 70493 (2020 жылы 73421, 2022 жылы 69858) тұрғын тіркелген. Оның 35513 ер, 34980 әйел,1 жасқа дейінгі балалар 1491, 5 жасқа дейінгі жеткіншектер 7870, жасөспірім 3303, туу жасындағы әйелдер саны – 15009-ға жеткен. 2020 жылдың 12 айымен салыстырғанда тіркелгендер саны 2928 тұрғынға азайған. Кадр бөлімі туралы айтар болсақ, 2020 жылдың 12 айында Жамбыл аудандық орталық ауруханасынды 862 қызметкер жұмыс жасаған болса, 2021 жылдың 12 айлық көрсеткіші бойынша 901 қызметкер тіркелген.
МЕДИЦИНАЛЫҚ МЕКЕМЕЛЕРДІҢ 85 ПАЙЫЗЫ КОМПЬЮТЕРМЕН ЖАБДЫҚТАЛҒАН
Өңірде өткен жылы 15052 сақтандырылмаған азаматтың санаттары анықталып, оның ішінде ауданда тұрмайтын, алайда тіркелімі бойынша осында қалған 825 азаматты өзектендіру мақсатында 9711 адамға түсіндірме жұмыстары жүргізілді.
Медициналық мекемелердің ғаламтор желісіне қосылуы деңгейі 88%-ды құрайды, яғни 33 мекеме интернет желісімен қамтылған. Электронды паспортпен тұрғындарды қамту деңгейі 96% пайызға жетсе, мекемелердің 85%-ы компьютермен жабдықталған.
ЕКПІНДІ ЖҰМЫСТАР ЖЕТІСТІГІМЕН ҚУАНТАДЫ
Жауапкершілікпен атқарылған жұмыс өз нәтижесімен қатар, жетістігімен де қуантады. «Цифрлық Қазақстан» мемлекеттік бағдарламасының аясында «ДамуMed» медициналық ақпараттық жүйесі еңгізілді. Қамтылу 100 пайыз. Сонымен қатар жүйеде рентгенологиялық кескіндерді науқастың электронды паспортына жүктелуіне арналған PACS жүйесі қосылған
Ағымдағы жылы жылжымалы медициналық кешен шалғай мекендегі тұрғындарға қызмет көрсетуде. Аудандық емхана мен Жалпақтөбе ауылдық емханасында МӘМС жарнасын төлеуге арналған терминалдар орнатылды.
Жамбыл аудандық орталық ауруханасы – «Е-кезек» электронды кезек жүйесін алғашқы іске қосқан облыстағы жалғыз мекеме. Аудандық емхана мен Жалпақтөбе ауылдық емханасында электронды кезек құрылғысы орнатылған.
ЕКПЕ ЕКТІРУ ЖҰМЫСТАРЫ ҚАРҚЫНДЫ ЖҮРГІЗІЛУДЕ
Жамбыл ауданы көлемінде екпе егу шаралары жүйелі түрде жүргізіліп келеді. Ауыл азаматтары, ата-аналар, жасөспірімдер екпенің тиімділігі мен қауіпсіздігіне көз жеткізуде. Басшылардың сөзіне сүйенсек, өңірге «Pfizer» екпесінің 10680 дозасы жеткізілсе, оның 12-17 жас аралығындағы жасөспірімдерге бірінші компонентінің 4741 дозасы, екінші компонентінің 2435 дозасы егілген. Ал бала емізетін аналардың 922-сі бірінші компонентті, 506 екінші компонентті салдырған. Жүкті әйелдердің 343-і бірінші компонентті, 199 екінші компонентті қабылдаса, ревакцинациядан 125 ана өткен. Сонымен қатар 60 жастан асқан азаматтардың 274-і «Pfizer» вакцинасын ектірген.
Баяндамашылардың сөзін мұқият тыңдаған Хамит Саттарқұлұлы аудандық орталық ауруханасының атқарған жұмыстарына оң бағасын беріп, ұсыныс-пікірлерге назар аударды.
