Ауыл әкімдерінің 51 пайызы жаңадан сайланды

Ұлттық қоғамдық сенім кеңесінің сарапшылары Қазақстан өңірлерінде ауыл әкімдерін тікелей сайлауын өткізу барысын талқылады. Іс-шараға ҰҚСК мүшелері, ҚР Парламент Мәжілісінің депутаттары, белгілі отандық саясаттанушылар мен әлеуметтанушылар қатысты. Шараны ҚР Президентінің көмекшісі, Ұлттық кеңес хатшысы Ерлан Қарин ашты. Ол өз сөзінде: «Реформалар мен диалог президенттік курстың негізгі бағыттарының бірі болып табылады. Мәселен, саяси бастамаларды жүзеге асыру аясында ғана қазіргі таңда 10 заң қабылданды. Олардың ішінде ағымдағы жылдың мамыр айында Мемлекет басшысы  «Қазақстан Республикасындағы сайлау туралы» ҚР Конституциялық заңына өзгерістер мен толықтырулар енгізу туралы» ҚР Конституциялық заңына және «Қазақстан  Республикасының кейбір заңнамалық актілеріне сайлау мәселелері бойынша өзгерістер мен толықтырулар енгізу туралы» ҚР Заңына қол қойды. Соның нәтижесінде биылғы жылдың екінші жартыжылдығынан бастап республика бойынша 811 ауылдық округте әкімдердің сайлауы өтті. Сайланған әкімдердің 86 пайызы   саяси партиялардың үміткерлері. Тағы 14 пайызы өзін-өзі ұсынған үміткерлер. Сонымен бірге, сайланған әкімдердің жартысы (51%) сайлауға дейін бұл қызметтерді атқармаған жаңа адамдар», – деп атап өтті.