Шымкенттік 34 жастағы Венера Жамалова биылғы сәуір айына дейін мемлекеттік атаулы әлеуметтік көмек алушылардың қатарында еді. «Еңбек» бағдарламасының маңыздылығын сезінген ол мемлекеттің уақытша көмегіне қол жаймай, бүгінде жұбайы тұрақты жұмысқа орналасуды жөн көрді. Нәтижесінде, бағдарлама аясында тапқан жұмыс орнында айлық көрсеткіші де жоғары болып, әлеуметтік жағдайы да тұрақталды.
Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» бағдарламасы Шымкент қаласының тұрғындарына тиімді болып тұр. Бағдарламаның әсіресе, азаматтардың тұрмысын жақсартып, өз кәсіптерін ашуға, қайтарымсыз грант пен төмен пайыздық мөлшерлемемен берілетін шағын несиелер алып, істерін бастауға септігін тигізуінің маңызы зор.
– Мен 2020 жылдың маусым айынан биылғы жылдың сәуіріне дейін АӘК алып келдім. Қиын сәтте мемлекеттің осы көмегінің арқасында отбасымызды асырауға, мүгедектігі бар баламның еміне де қаржылай көмек болды. Ал қазіргі уақытта жолдасым тұрақты жұмысқа орналасып, үй салуды да бастадық. Осындай көрсетілген көмекке алғысымызды білдіреміз, – дейді қала тұрғыны Венера Жамалова.
Сонымен қатар, Венера биыл халықты жұмыспен қамту орталығы арқылы 21 күндік «Бизнес бастау» оқу курсына жолданып, қолына сертификатын да алып отыр. Алдағы уақытта қайтарымсыз мемлекеттік грантқа өтінім беріп, өз кәсібін ашуға ниетті. Иә, істің көзін тапқанға кез келген кәсіп адал нәсіп болатыны сөзсіз.
