Батыс Қазақстан облыстық камералық оркестрінің жылдық қорытынды кеші Қазақстан жастар одағы «Серпер» сыйлығының және «Дарын» мемлекеттік жастар сыйлығының лауреаты, Нұр-Сұлтан қаласының «Музыкалық жас көрермен театрының» актері Аян Өтепбергеннің қатысуымен ұйымдастырылды.
«Атамекен» өнер орталығында өткен музыкалық кеш барысында қазақтың халық әндерінен бастап классикалық жанрдағы, түрлі бағыттағы туындылар орындалды. Сонымен қатар актер әрі әнші Аян Өтепберген өзінің әдемі әндерін көрерменге тарту етті. Көпшілік жылы қабылдаған рухани кеште камералық оркестр директоры, Қазақстан жастар одағы «Серпер» сыйлығының лауреаты, «Өнертану» магистрі Салтанат Абулгазиева Ақ Жайық өңіріне келіп, көрерменді өнерімен тәнті еткен Аян Өтепбергенге Батыс Қазақстан облысының әкімі Ғали Есқалиевтің алғысхатын табыстады. Сондай-ақ бұл күні оркестр құрылғалы бері 10 жыл бойына бар күш-жігері мен білім-білігін, жігер-қайратын ұжымның дамуы мен өркендеуіне арнап келе жатқан талантты музыкант, камералық оркестрдің бас дирижері Асхат Хасанов ҚР Мәдениет және спорт министрлігінің атынан «ҚР мәдениет саласының үздігі» төсбелгісімен марапатталды.
Ел Тәуелсіздігінің 30 жылдығымен және ұжымның 10 жылдық мерейтойымен айшықталған жылды батысқазақстандық оркестр ұжымы осылай түйіндеді.
