Жуырда ғана 10 жылдық мерейтойларын атап өткен Батыс Қазақстан облыстық камералық оркестрі Тәуелсіздік мерекесіне тарту жасамақ.
Классикалық туындыларымен көрерменнің құлақ құрышын қандырып жүрген өнер ұжымы тарту ететін Эльмира Усаеваның шығармашылық кеші 25 қараша күні су жаңа «Атамекен» өнер орталығының концерт залында өтеді. Никита Говоров дирижерлық ететін классикалық кеште осындай жанрдағы туындыға қызығушылығы ерекше, талғамы биік тыңдарман назарына барокко дәуірінің жарқын өкілдері, музыка әлемінде есімдері алтын әріппен жазылған Гендель және Вивальдидің туындылары жүрек тербеп, жанды тыныштандыратын болады.
Ал екінші кештің стилі ерекше. «Дарын» мемлекеттік жастар сыйлығының иегері Жасқайрат Валиуллиевтің «Тәуелсіздікке тарту» атты эклектикалық шығармашылық кешін сан түрлі өнердің басы тоғысқан кеш деуге әбден болады. Мұнда ән де, би де, сахна қозғалысы мен сахна тілінің озық үлгісі де көрсетіледі. Кеш облыстық камералық оркестрдің сүйемелдеуімен өтеді, бас дирижері – Асхат Хасанов.
