Жуырда Жоғарышыршық ауданындағы №18 жалпы орта білім беретін мектепте қазақтың ұлы ақыны Абай Құнанбаевтың 177 жылдығына арналған «Бауырлас қаламгерлерді еске алып» тақырыбында конференция өтті. Жиын, Ташкент облыстық Қазақ ұлттық мәдени орталығының төрағасы Дәмір Қалдыбаев пен Республикалық, аудандық орталықтар ынтымақтастығының ұйымдастыруымен өтті. Шараға Өзбекстан Республикасы Олий Мажлисі жанындағы Ұлт аралық қарым-қатынастар және шет мемлекеттермен достық байланыстар комитетінің бөлім бастығы Ирода Нематиллиева, танымал ақын-жазушылар Лола Жүнісқызы, Сабарбек Иманбеков пен ардагер журналистер Құлназар Ибрагимов, Қарахан Жораев, Өзбекстандағы Республикалық қазақ ұлттық мәдени орталығының төрағасы Серікбай Үсенов, Жоғарышыршық аудандық бөлімінің төрағасы Ескендір Алашбаев, сондай-ақ орталықтың белсенділері Әзиза Дүйсенова, ардагер ұстаз Рабия Үсеровалар қатысты.
Жоғары деңгейде өткен конференцияда «Дустлик» орденінің иегері ардагер Тұрсымат Қалбаев сөз сөйлесе, Серікбай Үсенов Өзбекстан көпұлтты мемлекет екенін атап өтті. Сондай-ақ, ол қазақтарға жасалған қолайлылықтар, ана тілін, мәдениетін, салт-дәстүрін сақтауға барлық мүмкіндіктер қарастырылғанын тілге тиек етті.
Шарада сөз сөйлеген азаматтардың барлығы ұлтаралық достықты жоғары бағалап, өздерінің ойларымен бөлісті. Солардың бірі Өзбекстан Республикасы Олий Мажлисі жанындағы Ұлтаралық қарым-қатынастар және шет мемлекеттермен достық байланыстар комитетінің бөлім бастығы Ирода Нематиллаева.
— Абай қазақ халқының бетке ұстар ақыны. Сондықтан да оның туындылары түбі бір туыс барлық халыққа таныс. Ақынның өлеңдері мен қара сөздері кез-келген ұлттың жастарына таптырмас рухани азық алуға, кітапқа деген сүйіспеншілігін арттыруға зор үлес қосады. Ұлттардың салт-дәстүрін сақтауға, оны дамытуға, болашақ ұрпаққа жеткізуге қызмет етеді деп санаймын, — деді.
Оқушылар ана тілімізде ән айтып, би биледі. Аудандағы №18, №22, №6 мектептердің оқушылары белсенділік танытты. Бостандық ауданының тумасы, жас болса да елге танымал әнші, Ташкент облыстық Шыршық педагогикалық институтының студенті Жанғали Әділов Абайдың «Көзімнің қарасын» шырқап, келген қонақтарды өнеріне тәнті етті.
Жергілікті ақын-жазушылар өздерінің түрлі тақырыпта жазған өлеңдерін оқып, қатысушыларды поэзия әлеміне бойлады.
Аталмыш мектептің директоры Гүлзира Елібаева ұлы ақынның шығармашылығы жайлы баяндама жасады. Достықты, шығармашылықты кең насихаттауға арналған жиында белсенділік танытқандар, ақын-жазушылар және оқытушылар мен оқушылар, облыстық Қазақ ұлттық мәдени орталығының алғыс хаттарымен марапатталды.
Адамдыққа, рухани тұрғыдан кемелденуге, ой-сананың толысуына ғасырлар бойы теңдессіз үлес қосқан туындыларды жастар арасында кең насихаттау баршаның міндеті. Ойымызды, аталған дүниелерді және достықты жастар арасында насихаттауда белсенділік танытып ақын, ардагер ұстаз, бірнеше кітаптардың авторы Лола Жүнісқызының «Мызғымасын достығы» атты өлеңімен шарамызды түйіндедік.
Бір шынардан өсіп шыққан,
Қазақ өзбек — қос бұтақ.
Сол бұтақтан өніп шыққан,
Дініміз бір, тіл ортақ.
Керек емес тәржіманың,
Сізді бірден ұғамыз.
Бір ұяның баласындай,
Тіпті ұқсар тұлғамыз.
Жадырасын көгімізде,
Нұрын төгіп күніміз.
Бақыт құшып бұл өмірде,
Шаттаныңыз, күліңіз.
Болашағы жарқын болсын,
Өсіп жатқан ұрпақтың.
Қадіріне жете білсін,
Туған елдей жұмақтың.
Бірлігіміз жоғалмасын,
Арта берсін нығайып.
Жақсы күнде осылайша,
Алдыңызға шығайық.
Жасай берсін екі елдің,
Мызғымасын достығы.
Өсе берсін абыройы,
Төмендемей шоқтығы.
