Есеп комитеті биыл 3,4 трлн теңге бюджет қаржысын қамтитын тексеріс жүргізіпті. Бұл – Есеп комитеті басшысының берген мәліметі.
«Мемлекет басшысы Есеп комитетінің төрайымы Наталья Годунованы қабылдады», – деп хабарлайды Ақорданың ресми сайты. Кездесу барысында Президентке Есеп комитетінің биылғы 9 айда атқарған жұмысы туралы есеп берілді. Осы кезеңде барлығы 3,4 трлн теңге бюджет қаражатын қамтитын 99 объектіде 17 аудиторлық тексеру жүргізілген.
«Наталья Годунова Қасым-Жомарт Тоқаевқа 2023-2025 жылдарға арналған республикалық бюджет жобасын бағалаудың негізгі нәтижелері туралы да мәлімет берді. Онда даму бюджетінің 3,5 трлн теңге қаржысы қамтылған. Сонымен қатар Мемлекет басшысына салық жеңілдіктерінің тиімділігіне жүргізілген аудиттің алдын ала қорытындылары ұсынылды», – деп жазды Ақорда.
Кездесу қорытындысы бойынша Президент мемлекеттік аудит жүйесін одан әрі дамытуға қатысты бірқатар нақты тапсырма берді.
