«Азаматтарға арналған үкімет» мемлекеттік корпорациясының Батыс Қазақстандағы филиалының баспасөз қызметі қаладағы халыққа қызмет көрсету бөлімдерінде дайын құжаттарды клиенттердің үйіне немесе жұмысына дейін жеткізу қызметі іске қосылғанын хабарлады.
Бұл құжаттардың ішіне 150-ге жуық мемлекеттік қызмет, атап айтқанда: жылжымайтын мүлікке құқықтарды (ауыртпалықтарды) мемлекеттік тіркеу, жер учаскелеріне актілер, білім туралы құжаттарды апостильдеу, мұрағаттық анықтамалар, әскери билеттердің телнұсқаларын беру және басқалары кіреді. Яғни, азаматтардың дайын құжаттарды алу үшін халыққа қызмет көрсету бөлімдеріне жүгінуі міндетті емес.
Нақтылап айтсақ, аталған құжаттар дайын болғаннан кейін клиенттің телефон нөміріне SMS-хабарлама келіп түседі. Одан әрі хабарламадағы сілтеме арқылы өтінімді толтырса жеткілікті. Құжаттар бір жұмыс күні ішінде иесіне жеткізіледі. Қызмет ақылы болғандықтан, қала бойынша жеткізу құны – 970 теңге.
– Біз клиенттер үшін мемлекеттік қызметтерді алу кезінде барынша қолайлы жағдай жасауға тырысамыз. Бүгінде дайын құжаттарды жеткізу бойынша жаңа сервисті енгізудеміз. Бұл біздің клиенттеріміздің мемлекеттік қызметтерді алу үшін жұмсайтын қаражаты мен уақытын айтарлықтай үнемдейді. Бүгінде аталған сервис Орал қаласы бойынша халыққа қызмет көрсету бөлімдерінде қолжетімді, – деді «Азаматтарға арналған үкімет» мемлекеттік корпорациясының БҚО бойынша филиалының директоры Нәдір Құрымбаев.
Еске сала кетсек, 2021 жылы алғаш рет бұл сервис Алматы, Нұр-Сұлтан, Шымкент қалаларында іске қосылған екен.
