Теміртау қаласында алғаш рет облыстық "Тұғыры биік Теміртау" атты жас ақындар айтысы өтті. Сөз сайысына 14 ақын сынға түсті. Жыр додасы Қазақстан Республикасы Тәуелсіздігінің 30 жылдығымен "Жауыртаудағы кездесу" фестивалі аясында ұйымдастырылды.
Облыстық айтыста саңлақтардың қарымын Елбасының үзеңгілесі, Теміртау қаласының Құрметті азаматы Қуаныш Омашев, әнші, Құрмет орденінің иегері Сержан Мұсайын, айтыскер ақындар Аханов Мақсат пен Дидар Қамиев, сондай-ақ айтыстың төрағасы,ақын Қазақстанның мәдениет қайраткері Қойлыбай Асанов бағалап, қазылық етті.
Ойдың тұнығын, сөздің шымырын теріп, көрерменді қуантқан жыр жампоздарына қаржылай сыйақы табыс етілді. Үшінші орынды теміртаулық Ерғалиев Әлихан мен Шахтинск қаласының Байсүгіров Нұрмұхамед, екінші орынды қарағандылық Рымбай Нұрсұлтан мен теміртаулық Тілеубек Жанарыс иеленді. Бірінші орынды теміртаулық Бекболат Еркеғали қанжығасына байлады. Сөз додасының нәтижесінде облыстық айтыстың бас жүлдегері болып- Шет аудандық Әділов Мұхтар танылды. Сонымен қатар, жыр додасында арнайы жүлделер тігілді: жаңаарқалық Бейсенбеков Сырымға Арғын Жүңісов атындағы арнайы жүлдесі, қарқаралық Оспанов Бекарысқа Жүрсін Ермановтың атынан арнайы жүлде табыс етілді.
