Нұр-Сұлтан қаласы әкімдігінің қолдауымен 9-мамыр – жеңіс күні мерекесіне орай ҰОС ардагерлеріне арналған «Айбынды ардагерлер» атты көшпелі концерт ұйымдастырылды.Сый-сияпатқа толы «корзиналарын» да ұмытпаған жастар ардагерлерді үйлерінің ауласына барып, құттықтап, марштық әндер айтып, жылы лебізін білдірді.
– Бұл – дәстүрлі шара. Биыл төртінші рет өткізіліп жатыр. Бұл идея ардагерлерге құрмет көрсету мақсатында туындаған болатын. Ардагерлеріміздің ауласына, үйіне кіріп те концерт қою – ерекше іс-шаралардың бірі. Сол сияқты шағын әскери-патриоттық парад сол кісілердің ауласында өткізіледі. Қазір елордада 18 қарт жауынгер бар. Барлығы да айрықша құрметке лайық. Жыл сайын бізді асыға күтеді. Ардагерлеріміздің ең жасы 92-де, үлкені 99-ға келіп жатыр. Арасында төсек тартып қалғандары да бар. Өкіншітісі сол, жыл өткен сайын майдан көрген қариялар қатары сиреп барады. Осындай форматтағы концерт арқылы олардың ерлігі мен рухына бас иіп, барынша құрмет көрсеткіміз келеді,- дейді Нұр-Сұлтан қаласы Жастар саясаты мәселелері басқармасының бөлім басшысы Ақұлан Тастемір. Ал ақсақалдар жастарға ризашылығын білдіріп, батасын беріп жатыр. – Жастарда бірлік болсын. Бірлік бар жерде тірлік бар. Қазір ойланып қарасам, жеңіске жету үшін талай тағдыр қыршыннан қиылды. Бірақ, біз, еш мойымай, тек алға ұмтылдық және жеңіске жеттік. Көңіл бөліп келіп, құрмет жасаған¬дарыңызға рахмет. Осы балапандарым оқып, елдің алдына шығып, еліміз қадірлі ел болсын. Әмин. Рахмет!, -деді соғыс ардагері Жүсіпбек Кәрімов.
Қаланың әр жеріндегі мекен-жайларды аралап, концерт қойған экскурсиялық автобус нағыз көшпелі сахнаға айналды. Жалынды жастардан құралған арнайы топ Көктал шағын ауданындағы «Шарапат» қарттар мен мүгедектерге арналған медициналық-әлеуметтік мекемесіне де атбасын бұрды. Мұнда да «Ерлікке тағзым – ұрпаққа мұра» қағидасымен қарт майдангерге ерекше құрмет көрсетіп, сый-сияпат жасады. – Бүгінгі репертуарымызды ардагерлерімізге арнайы түрде дайындадық. Соғыс жылдарындағы әндер, әрбір ардегердің жүрек түкпірінен орын алған – жеңіс күніне арналған музыкалар қойылды. Олар қарша борап тұрған оқтың астында бүгінгі біздің бейбіт заманда өмір сүруіміз үшін қан кешті. Оларға құрмет ретінде шағын концерт қойдық, -деді Е.Рахмадиев атындағы филармонияның үрмелі аспаптар оркестрінің көркемдік жетекшісі Никита Почиталин.
Қан майданда толарсақтан қан кешкен аталар рухына тағзым етіп, құрмет көрсету әрқайсымыздың азаматтық борышымыз. Ерлік ұмытылмайды.
