Үш мыңнан аса жәдігері бар Байзақ аудандық тарихи-өлкетану музейі ата-бабамыз жүріп өткен талайғы тарихты жас ұрпаққа танытумен келеді. Музейдегі әрбір экспонаттың өзіндік құндылығы бар. Айталық, археология залында тұрған мына құмыра VІІ-ХІІ ғасырларға тән. Шөлтөбе өңірінен табылған қыш құмыраның биіктігі – 31 см. Ал, салмағы – 28 келі. Қолдан құйып жасалынған көшпенді халқымыздың осынау қолөнері тұрмыста ыдыс ретінде пайдаланылғаны анық. Жазда су құйып, қыста тоңазытқыш ретінде қолданылған үлкен құмыра музейге келушілерді ерекше қызықтырады.
Тері кесте
Кезінде апа-әжелеріміз өрнектеп кесте тіккенін бәріміз білеміз. Ал, Байзақ аудандық тарихи-өлкетану музейіндегі мына бір кесте өте ерекше. Ерекшелігі сол, ол мал терісін өңдеп, бетіне түрлі-түсті жіптермен әрлеп тігілген. Кестенің 200 жылдық тарихы бар. Мамандардың айтуына қарағанда, кестеге сиыр малының терісі қолданылған. Оның бетінде гүлдер мен жапырақ суреті бейнеленген. Ерекше туындыны Байзақ аудандық тарихи-өлкетану музейі ашылған 2010 жылдары көрші Жамбыл ауданының тұрғындары сыйға тартқан. Кестенің көлеміне келсек, ұзындығы – 30, ені 30 сантиметрді құрайды.
