Иранда ереуілдеген жұрттың арыны басылмай тұр. «Рейтер» агенттігі таратқан соңғы мәліметтер бойынша ереуілдер кезінде тәртіп сақшыларымен болған қақтығыста 5 адам қайтыс болған көрінеді. Күрдтердің «Хенгау» адам құқығын қорғау ұйымы: «Қауіпсіздік күштері Күрд аймағындағы Аминидің туған қаласы Сакезде демонстранттарға оқ жаудырып, екі адам қаза тапты. Тағы екеуін Дивандарреде қауіпсіздік күштері тікелей атып өлтірді. Күрдтер аймағындағы Дехголанда тағы бір адам қаза тапты», – деген хабар таратқан. Алайда ресми билік органдары бұл хабарды әлі растаған жоқ.
13 қыркүйек күні Тегеран көшесінде кетіп бара жатқан 22 жасар Махса Амини есімді қызды шариғат сақшылары «басына тартқан орамалы шариғат талаптарына сай емес» деген сылтаумен ұстап әкеткен. Арада үш күн өткенде «жүрек талмасынан қайтыс» болды деген хабар таратқан күштік құрылым өкілдері қыздың сүйегін табытқа салынып, мөрленген күйде отбасына тапсырған. Әрі жылдам жерлеуді бұйырған.
Міне, осы әрекеттен кейін Тегеранда және бірнеше қалада жұрт жаппай ереуілге шықты. Кейбір аудандарда шерушілер көлік қозғалысын тоқтатып, жолды жабу үшін көшелерге шыққан. Иран президенті бұл істі жіті тексеруді бұйырып, халықты сабасына түсуге шақырып жатыр.
Аминидің әкесі «Америка дауысы» радиосының парсы тілі бөлімінің журналисіне сұхбат беріп, биліктің уәжіне сенбейтіндігін айтыпты. «Мен биліктің айтқандарына сене алмаймын. Қызымның денсаулығы жақсы болатын. Қазірге дейін жүрек ауруымен ауырған емес. Бұл жерде күдікті жағдайлар болып отыр. Мен құзырлы орындардан бұл іске қатысы бар адамдарды түгелдей жауапқа тартуды талап етемін. Өлген қызым енді қайтып келмейді. Алайда мұндай жағдай енді қайтып ешкімнің басына түспесе екен деп тілеймін», – дейді Аминидің әкесі.
Қазір халықаралық адам құқығын қорғаушы ұйымдар мен өзге де демократиялық елдер Иран билігінен бұл істі әділ әрі ашық тексеруді талап етіп жатыр.
Қазір әлеуметтік желілерде Ирандағы ереуілдерде әйелдердің билікке наразылық ретінде бастарындағы орамалдарын лақтырып тастап, шаштарын кесіп жатқан видеолары көп таралып жатыр. Наразы жұрттың қашан тарқайтыны белгісіз. Иран билігі бұл шерулерді «дұшпандардың арандатуы, барлығы да жоспарлы түрде жүзеге асырылып жатыр» деп баға беріп отыр.
