Бүгін Краснодар қаласында жергілікті «Краснодар» РПЛ 10-туры аясында чемпионат көшбасшысы «Зенитті» қабылдайды.
«Краснодар» бабында. Осы маусымда өз алаңында өткізген төрт матчта үш рет жеңіп, бір мәрте ғана ұпай жоғалтты. Шілденің соңында махачкалалық «Динамомен» тең түскен болатын. «Бұқалар» турнир кестесінде «Зениттен» екі ұпайға қалып, екінші орында келе жатыр. Осы матчтан кейін чемпионат көшбасшысы ауысуы мүмкін.
Сергей Семак шәкірттері осы маусымда «Краснодармен» бір мәрте кездескен, сол кезде Суперкубок матчында петерборлық клуб 4:2 есебімен жеңген еді. «Зенит» чемпионаттағы тоғыз матчтың екеуінде ғана жеңе алмады, «Химки» мен «Спартакқа» қарсы матчтары тең аяқталды. «Зенит» пен «Краснодар» арасындағы соңғы төрт ойын нәтижелі болды. Одан бөлек, Максим Глушенков жарақатынан айықты.
Командалар бір-бірімен 27 рет кездескен. «Зенит» 17 рет жеңіп, «Краснодар» үш мәрте ғана басым түсті, қалған жеті матч тең аяқталды.
