Қара күз бен қыс-көктем жер баптап, дән сіңіріп, жаз тілеуі көктеген егіннің үстінде болған шаруалар бүгінде піскен егістікке орақ салғалы бір аптадан аса уақыт өтті.
Бүгінгі күні аймақта 1 420 тонна өнім жиналып, әр гектардан алынған орташа өнім 18,0 ц/га құрап отыр.
Астықтың 180 гектарынан 558 тонна өнім жинаған Меркі ауданында әр гектардан алынған өнім - 31,0 ц/га құраса, Қордай ауданында – 20,0 ц/га құрап, облыстық деңгейден жоғары көрсеткіш көрсетуде. Сол сияқты Т.Рысқұлов ауданында – 14,5 ц/га, Жамбыл ауданында – 14,3 ц/га, Байзақ ауданында – 13,0 ц/га құрауда. Бұл көрсеткіштердің қазіргі уақыттағы есеп екенін ескерсек, өсім көрсеткіші әлі де арта түсетіні түсінікті.
Жалпы биылғы жылы 370 000 гектарға арпа-бидай (153 855 гектарға бидай, 216 145 гектарға арпа) егілсе, қазіргі уақытта оның 790 гектары орылды. Науқанға 361 комбайн қатысуда.
Астықты ысырапсыз жинап алудың маңызды шарты - шаруалардың қолында дизелдік отынның жеткілікті болуы. Осыған орай, биылғы жиын-терім жұмыстарына 10 725 тонна арзандатылған жанар-жағар май бөлінген болатын және оны тарату үшін 15 оператор анықталып, литрі 194-200 теңгеден босатылуда.
Қазіргі таңда дәнді дақылдарды жинау барлық аудандарда жоспарлы түрде жүріп жатыр. Ендігі жердегі басты мақсат - астықты төкпей-шашпай жинап алу.
