ҚР Оқу-ағарту министрлігі Балалардың құқықтарын қорғау комитеті «Мектепке жол» республикалық қайырымдылық акциясын іске қосты. Балалар жылында бұл акция «Мектепке жол – Шекарасыз жақсылық» ұранымен өтіп жатыр.
Акция 2022 жылғы 31 тамызға дейін, яғни жаңа оқу жылы басталғанға дейін жалғасады. Науқанға кез келген адам немесе еріктілер, бизнесмендер, меценаттар, үкіметтік емес ұйымдар және басқа да тілек білдіруші топтар қатыса алады. Қатысушылар мұқтаж отбасылар мен балаларға қолдау көрсете алады немесе керісінше көмек сұрай алады.
– Акция аз қамтылған, көпбалалы отбасылардан шыққан мектеп оқушыларына, жетім және ата-анасының қамқорлығынсыз қалған балаларға қажетті көмек көрсету мақсатында өткізіліп отыр. Балаларды жаңа оқу жылына дайындауға кез келген адам көмектесе алады. Осылайша әлеуметтік себептермен балалардың мектепке бармауының алдын аламыз. Әрбір мектепте әлеуметтік көмекке мұқтаж балалардың атаулы, жеке тізімдері жасалған. Білім беру ұйымдарында «жедел желі» үздіксіз жұмысы ұйымдастырылған. Қиын өмірлік жағдайға тап болған барлық бала мен ата-ана көмек сұрай алады. Өз кезегінде бей-жай қарамайтын азаматтар, кәсіпкерлер, меценаттар акцияға қосылып, мұқтаж жандарға қол ұшын соза алады, – деді ҚР Оқу-ағарту министрлігі Балалардың құқықтарын қорғау комитетінің төрағасы Есенғазы Иманғалиев.
«Мектепке жол» акциясы жыл сайын жаңа оқу жылы қарсаңында өткізілетінін атап өтейік. Акцияның 10 жылында 2 миллионнан астам балаға материалдық көмек көрсетілді. «Мектепке жол» акциясына қатысу үшін білім басқармалары мен ұйымдарына хабарласу қажет.
Дегенмен «Мектепке жол» акциясы төңірегінде де бірқатар шешілмеген мәселелер бар екенін айта кету керек. Яғни «Мектепке жол» акциясы аясында көбіне көмекке зәру ата-аналардың мектепке баратын балаларына дайын күйінде киім, оқу құралдар жиынтығы ұсынылып жатады. Алайда ата-аналар тарапынан көмек заттай емес, ақшалай берілсе деген өтініштің бар екені ескерілмейді. Өйткені ата-аналар әдетте заттай берілетін көмектің сапасы мен өлшеміне шағымданғанымен, Үкіметтің қолданыстағы 64-қаулысына сәйкес мұқтаж отбасылардың балаларына мектеп формасын алып беру міндеттелген болатын.
