Қызылорда облысының әкімі Нұрлыбек Нәлібаев келген бойда, өңірдің әлеуметтік-экономикалық даму жағдайын саралады. Келелі жиындарда мәселелер талқыланып, елдің әлеуеті, атқарылған жұмыстары баяндалды.
Облыс әкімі өңірдің негізгі макроэкономикалық даму көрсеткіштерінің басым көпшілігі республикалық деңгейдегі орташа көрсеткіштен төмен екенін ескертті және инвестицияларды тарту жұмысын тез арада күшейтуді тапсырды.
Жиында өндірісті дамыту, шағын және орта бизнесті көбейту, инвестицияларды тарту бағытында атқарылған жұмыстарға талдау жүргізді. Сондай-ақ, ауыл шаруашылығы және жер дауы мәселелері де шет қалмады.
Мұнан өзге энергетика саласында инфрақұрылымдық желілердің тозу деңгейін саралап, келер жылу беру маусымына дайындық жұмыстарын осы кезден бастауды тапсырды.
Кеңейтілген жиында білім, денсаулық, жұмыспен қамту салаларындағы өзекті бағыттар ашық талқыланды. Нұрлыбек Нәлібаев ана мен бала өлімін азайту, жаңа мектептер салу, нақты жұмыс орындарын құру бағытында кешенді талдау жүргізіп, ұсыныстар даярлауды қатаң тапсырды.
Сондай-ақ, аймақтың қоғамдық-саяси ахуалы мәселесін саралаған өңір басшысы «Халық үніне құлақ асатын мемлекет» тұжырымы аясында қоғаммен сындарлы диалог орнатуға дайын болуды және әлеуметтік шиеліністі болдырмауға қажетті жұмыстарды күшейтуді жүктеді.
Облыс басшысы мемлекеттік аппаратты оңтайлы және тиімді ету мақсатында бағыттас басқармаларды біріктіріп, 24 басқармадан 8-ін қысқартып, облыс әкімдігінің құрылымында 16 басқарма қалатынын жеткізді. Сондай-ақ, бұдан әрі облыс әкімінің штаттағы және штаттан тыс кеңесші лауазымдары болмайды. Аймақ басшысы «біздің кеңесшіміз – халық!», - деді.
Облыс әкімі өңірдің экономикалық көрсеткіштерін дамыту бағытында атқарылатын бірқатар мәселелерді де атап, алдағы міндеттерге тоқталды.
