2021 жылдың 19 қарашасында Нұр-Сұлтан қаласының Л.Н.Гумилев атындағы Еуразия ұлттық университетінде Қазақстан Республикасы Тәуелсіздігінің 30 жылдығына орай, Қарағанды облысы әкімдігінің қолдауымен Сарыарқаның кемел ұлы, қазақ ақын-публицисі Қасым Аманжоловтың 110-жылдық мерейтойына арналған көрменің ашылу салтанаты өтті.
Жастар арасында қазақтың жаңашыл ақыны, публицист, композитор – Қасым Амонжоловтың мұрасын дәріптеу және насихаттау мақсатында ұйымдастырылған көрмеде қатысушыларға ақынның отбасылық мұрағатынан алынған фотосуреттері, өмірбаяндық артефактілері, деректі материалдары, кітаптары, көрме экспонаттары таныстырылды.
Қасым Аманжоловтың мерейтойы аясында әзірленген іс-шаралардың кешенді жоспары өз жалғасын Нұр-Сұлтан қаласының «Астана» концерт залында Қазақстан Республикасының Тәуелсіздігінің 30 жылдығы мен дауылпаз ақын Қасым Аманжоловтың 110 жылдығына арналған «Жырға айналған ғұмыр» әдеби-сазды кешімен жалғасты.
Сахна төрінде еркіндікке ғашық, бостандыққа құштар, азаттықты аңсаған ақынның өлеңдері оқылып, көркем өнердің телегей теңізі – Қасым Аманжоловтың өмірінен алынған көріністер ұсынылды.
Аталмыш мерейлі кеште Қарағанды облысының Қали Байжанов атындағы концерттік бірлестігі, Сәкен Сейфуллин атындағы Қарағанды облыстық академиялық қазақ драма театырының әртістері, Нұр-Сұлтан қаласының филармониясы, Қазақстанның Халық әртісі Роза Рымбаева, Қазақстан эстрада жұлдыздары Клара Төленбаева, Гаухар Жүсіпова, Саят Әбдіғали және «Жарқын» халық би ансамблі өнер көрсетті.
