Бүгін Астанадағы «Қазмедиа» орталығында онлайн марафон өтіп жатыр. Таңғы 9:00-ден түнгі сағат 01-ге дейін жалғасатын марафонның көрігі дәл қазір қыза түскен. 
Пікір алмасу алаңында түрлі көзқарастағы спикерлер ұйымдастырушылар ұсынған әртүрлі тақырыпта пікірлерін айтып, ой жарыстырып жатыр.
Соңғы кезде «Қазмедиа» орталығында марафон өткізу кәдімгідей дәстүрге айналып келеді. 
Аузында «дуасы» бар игі жақсылардың басын қосып, дастархан жайылып сәні мен салтанаты келіскен жиынның мәнін білу үшін, журналист, «Қазақстан» РТРК АҚ басқарма төрағасы Ләззат Танысбайды сөзге тартқан едік. – Онлайн марафон жиі ұйымдастырылатын болыпты. Бұл не деген марафон, мақсаты қандай?, -деген сұрағымызға, – Жиі емес. Бұл үшінші рет өтіп жатқан марафон, үшінші тәжірибеміз. Бірінші ҚР Конституциясына өзгерістер енгізуге қатысты референдум кезінде, екінші Президент сайлауы кезінде және бүгін өтіп жатыр. Бүгінгі онлайн марафонға жалпы 16 сағаттық контент дайындадық. Күні бойы бұл алаңнан жалпы есептегенде 2000-ға жуық қонақ өтеді. Түнгі он екіде ең бірінші экзитполдың бүгінгі сайлауға қатысты алдын ала нәтижелері осы жерде жарияланады, -деді Ләззат Танысбай.
