Орал қаласындағы физика-математика бағытындағы Назарбаев Зияткерлік мектебінің 7-сынып оқушысы Алихан Ғайнулла химия пәнінен республикалық жасөспірімдер олимпиадасында І орынға ие болды.
Бұл туралы зияткерлік мектептің баспасөз қызметі хабарлады. Еліміздің әр түкпірінен сынға түскен 22 оқушының арасынан топ жарған Алиханның жоғары ұпайы айналасының айрықша таңданысын туғызған. Ол Назарбаев зияткерлік мектебіне оқуға былтыр қабылданыпты. Химиялық эксперименттерді жасауға жаны құштар жеткіншек аталған ғылымға зор қызығушылығы бар екенін байқатып үлгерген. Сонымен бірге шахмат ойындарына қатысып, жүлделі орындарға ие болып жүр екен.
– Зияткерге жетекшілік еткен мектебіміздің химия пәнінің мұғалімі Гүлсім Киматова да Алиханның бойында ерекше сенімділік пен зор ізденістің бар екенін жасырмады. Дарынды оқушыны одан әрі дамыту жұмыстары жалғаса бермек, – дейді мектептің баспасөз хатшысы Мөлдір Латифова.
