Бас прокуратураның қаулысы Ашық нормативтік-құқықтық актілер сайтында: «Құқық қорғау, азаматтық қорғау органдары мен мемлекеттік фельдъегерлік қызмет жұмыскерлерінің ант беру қағидаларына өзгеріс енгізілуі мүмкін», – деген ақпарат жарияланды. Құжатқа сәйкес, енді аталған қызметтерді атқаратын азаматтар келесі мәтін бойынша ант қабылдайды:
Мен, __________ (тегі, аты, әкесінің аты) Қазақстан Республикасының құқық қорғау органдарына, азаматтық қорғау органдарына, мемлекеттік фельдъегерлік қызметіне қызметке кіре отырып:
өз халқыма адал қызмет етуге, Қазақстан Республикасының Конституциясы мен заңдарын қатаң сақтауға және өзімнің барлық іс-әрекеттерімде заңдылық пен әділеттілік қағидаттарын ұстануға тиіспін;
- өзіме жүктелген міндеттерді адал орындауға, адамның және азаматтың құқықтары мен бостандықтарын, қоғам мен мемлекеттің мүдделерін қылмыстық және өзге де құқыққа қарсы қол сұғушылықтардан қорғау үшін барлық күш-жігерім мен білімімді жұмсауға;
- моральдық тазалықтың, қарапайымдылықтың үлгісі болуға, өзімнің кәсіби абыройымды, Қазақстан Республикасының құқық қорғау органы, азаматтық қорғау органы және мемлекеттік фельдъегерлік қызмет қызметкерінің жоғары атағын қадірлеуге;
- қызметке байланысты қиындықтарға лайықты төтеп беруге ант етемін.
- Антты бұзу Қазақстан Республикасының заңдарында белгіленген жауаптылыққа әкеп соғатынын ұғынамын.
Анттың жаңа мәтінін бекіту туралы қаулы 23 тамызға дейін ашық талқылауға шығарылған. Кейін қол қою үшін Президентке жолданады.
