Біздің талап мынау: Зейнет жасы көп балалы аналарға 50 жас болуы тиіс!
Бізді шетелмен салыстырмаңыз, оған біз де, біздің бүгінгі қоғам да, көзқарас та, әлеуметтік жағдай да басқа. Біз ол дәрежеге әлі жеткен жоқпыз. Бізде 50 жастағы әйел бір жерге жұмыс сұрап барса, жасың үлкен деп, жұмысқа қабылдамайды. Жұмыссыз сандалып, не істерін білмей, балалардың, күйеуінің қолына қарап, мүсәпір хәлге түсіп, үнсіз, лажсыз, даусы еш жерге жетпей жүрген әйелдер мың-мыңдап жүрміз. Ал жұмыстағы әйелдер, жасы 58, 59 жаста, әлтек-тәлтек етіп, жұмысқа жарамай, лажсыз жұмыста жүргендері де көп. Аналарға деген бұл ұсынысыңыз Үкіметтің арнайы дайындаған қорлығы деп қабылдап отырмыз. Біз биліктегі жылы жер, жұмсақ креслода отырған аналар емеспіз. Біз кәдімгі қара жұмыс жасап жүрген аналармыз. Әлде өңкей кемпірлер сізден рұқсат болса, бейбіт шеруге шығайық па? Біз де адамбыз ғой.
Шашымыз аппақ, аяқтарымыз қалтаң-қалтаң етіп, жастармен, немереміздей балалармен таласып-тырмысып, жеккөрінішті болып жүре берелік пе? Билік өкілдері, министрлер, депутаттар бәріңді де ана, әйел дүниеге әкелді ғой. Енді біз асыл ана емес, бейшара, мүсәпір ана деген атқа ие болып қалдық. Шынымен де жастар басқаша көзбен қарайтыны хақ. Бүгінгі Қазақстанның заңын білмейтін жастары: «Апай, үйіңізде немереңізді қарап жатпайсыз ба?» деп аяушылықпен қарайды. Олар ақша үшін жүр деп ойлайды. Бізді бұлай қорламаңыздар!
Зейнет жасын ұлғайту, көрге қарай мәдениетті, ың-шыңсыз сүйреу секілді көрінеді. Сондықтан қадірлі, Әлихан Смайлов мырза! Аналардың жанайқайын тыңдаңыз! Аналардың жағдайы түзелгенде ғана мемлекет гүлденеді, қазақтың саны көбейеді, балаларымыз тәрбиелі, көргенді, иманды болып өседі. Біздің жоғарыдағы талабымызды ескеріп, зейнет жасын ұлғайтпаңыз. Өтінішіміз жерде қалмайды деп сенеміз.
