Мемлекеттік рәміздер – біздің ең басты құндылығымыз бен байлығымыз. Ол мемлекеттілік пен тәуелсіздіктің символы болып саналады. Жылда елімізде 4 маусымда Мемлекеттік рәміздер күні атап өтіледі. Бүкілхалықтық мереке халқымызды бұрынғыдан да біріктіре түседі, ұлттық сананы қалыптастырып, патриоттық сезімді оятпақ. Тәуелсіздікке қол жеткізу тарихында төл рәміздеріміз дүниеге келген сәт тарихта ерекше орын алады. Мемлекеттік рәміздер тек көркем образ ғана емес, тәуелсіз мемлекет құру идеясының жаршысы. Ол ізгі сезімдерді адамдардың жан дүниесіне сіңіру үшін қызмет етеді. Қыран бейнеленген көк Туымыз, ерекше шаңырақ шырайлы Елтаңбамыз, Әнұранымыздың әсем әуені, әдемі мәтіні тәуелсіз еліміздің атынан әлем алдында сөйлейтін ресми белгіге айналып келеді. Мемлекеттік рәміздер – еліміздің дербестігі мен тәуелсіздігін бүкіл әлемге паш ететін, мемлекетіміздің өткені мен бүгіні, болашағын танытатын жарқын көрініс. Сонымен қатар рәміздер – халқымыздың асқақ рухын, қаһармандығы мен ерлігін жеткізетін құндылық. Оларға қарап, біз халқымыздың тарихы мен тағдырын, бірлігі мен мақсатын аңғарамыз.
Әнұранымыз Олимпиадада және басқа да халықаралық жарыстарда, кейде тойдың, концерттердің соңында шырқалып жатады. Иә, біз мұны мақтан етеміз. Мемлекеттік рәміздер – біздің сонау ғасырлар қойнауынан сыр шертер тағылымды тарихымыздың шынайы көрінісі. Рәміздерге деген құрмет – азаматтардың өз елінің азаматы екендіктерін қабылдауы, еліміздің болашағына деген сенім мен патриоттық сезімдерінің өлшемі. Мемлекеттік рәміздерге деген құрмет жастар арасында кеңінен насихатталып, айтылып отыруы тиіс. Жастарға балабақшада, мектепте оқушы кезінен бастап Мемлекеттік рәміздерге құрметпен қарауды үйретуіміз қажет. Рәміздердің шығу тарихы мен олардың авторы жайлы мәліметтерді кеңінен беріп отыруымыз тиіс. Өйткені қазір бала тұрмақ, өкінішке орай, үлкендердің өзі осыны біле бермейді.
Мемлекеттік рәміздер – ел дамуының ажырамас бір бөлшегі. Әрбір Қазақстан азаматтарының осы рәміздерге деген ілтипаты мен құрметі, оларды көзінің қарашығындай сақтауы ерекше сезіліп тұруы керек. Рәміздер арқылы елімізді бүкіл әлем таниды десе де болады. Өйткені, онда қазақ халқының бастан өткізген тарихы, мәдениеті мен дәстүрі көрінеді. Жас ұрпақтың отансүйгіштік сезімін оятып, патриотизмге, батылдыққа үндейді. Өзін қазақ елінің нағыз патриотымын деп есептейтін әрбір азамат Мемлекеттік рәміздерді құрметтеп, қастерлегені жөн. Өйткені Рәміздерді құрметтеу – елді құрметтеу.
