Шекарадағы ауылдарды дамыту жалғасады

Ауылдарда орналасқан шекара заставаларының инфрақұрылымы жетілдіріледі. Үкімет отырысында ҚР Ұлттық экономика министрі Әлібек Қуантыров: «Жалпы қазіргі таңда шекаралық облыстарда шекарадағы ауылды елді мекендерді дамытуға арналған жобалар «Ауыл – ел бесігі» жобасының аясында іске асырылуда. Мемлекеттік шекарадан 50 шақырым қашықтықта орналасқан ауылдардың саны 1,3 мың. Ол ауылдарда 1,7 млн адам тұрады. Министрлік тарапынан осы ауылдарды дамыту үшін тиісті жол картасы әзірленді. Бұдан басқа тиісті жұмыс тобы жұмыс істейді.   Ауылдарды дамытудың 2023-27 жылдарға арналған тұжырымдаманың жобасы әзірленген. Бұл жобада инфрақұрылымды дамытудан басқа өзге де қызметтер қалыптастырылады. Оның ішінде отандық эфир, эфирлік телеарналар, интернетті күшейту сияқты шаралар және ауылдарда орналасқан шекара заставаларының инфрақұрылымын күшейту де көзделген», – деп мәлімдеді.