Нұр-Сұлтан қаласының көшелеріне «Сергек» орнатылғалы жаяу жүргіншілер де сергек жүретін болды. Әйтсе де көлік иелерінің айтар уәждері де жетерлік. Жол ережесінің сәл ғана қателігін кешірмейтін «Сергектер» айыппұлды да аямай-ақ салуда. «Аға-көке» дейтін тамыр-таныстыққа жол бермейтін «Сергекке» үрке қарайтындар да, «Әп-бәрекелді!» деп жылы шырай танытатындар да арамызда жетерлік.
Қалада жыл басынан бері 500 мыңнан астам жол ережесін бұзу дерегі тіркелген. Нұр-Сұлтан қаласының Полиция департаменті жергілікті полиция қызметі басқармасының ерекше тапсырмалар жөніндегі аға инспекторы Нұрлан Қаппаровтың хабарлауынша, елордада 2022 жылы 500 мыңнан астам жол ережесін бұзу дерегі тіркеліп, жүргізушілерге 4,6 млрд теңге айыппұл салынған. «2022 жылдың басынан бергі уақытта елорданың полиция департаменті 4 639 481 646 теңге сомаға 542 612 әкімшілік құқық бұзушылықты анықтады. Соның аясында 3 647 778 893 теңге өндірілді. Өндіріп алу көрсеткіші – 78,6%», – деп атап өтті Нұрлан Қаппаров. Полиция департаментінің аға инспекторының мәліметінше, аталған құқық бұзу фактілерінің 422 339-ы «Сергек» камералары арқылы тіркелген. Ол фактілер негізінде 3 207 892 304 теңге айыппұл салынған.
