Сеулдегі қасірет

Соңғы мәліметтер бойынша, Итэвонда (Сеул, Оңтүстік Корея) Хэллоуинді тойлау кезінде жаппай қысымнан151 адам қаза тауып, 82 адам зардап шексе, 100-ге тарта адам ауыр жағдайда көрінеді. Оларды Итэвон ауданындағы Гамильтон қонақ үйі маңындағы Хэллоуин мерекесі кезінде тар көшеде алға жылжып бара жатқан үлкен тобыр басып қалған. Оңтүстік Кореядағы ҚР елшілігінің консулдық бөлімі тәулік бойы жұмыс режиміне ауыстырылды. ҚР СІМ баспасөз қызметі: «Сеул қаласының жедел штабы мен полициясының мәліметінше, Итэвон ауданындағы қайғылы оқиға салдарынан қаза тапқандардың арасында Қазақстан Республикасының азаматшасы, 1996 жылы туған, Ақтөбе облысының тумасы табылды. Ол Корея Республикасының жоғары оқу орындарының бірінің студенті болған. Қазақстандық дипломаттар қаза тапқан қыздың туыстарымен байланыста, құжаттарды ресімдеуге және мәйітті Қазақстанға одан әрі жеткізуге барлық қажетті көмек көрсетуде», – деп хабарлады.