СІМ-нің ресми мәлімдемесі не дейді?

Сыртқы істер министрлігінің ресми өкілі Айбек Смадияров: «Қазақстан халықаралық құқық пен БҰҰ Жарғысына сәйкес мемлекеттердің аумақтық тұтастығы және егемендік теңдігі қағидаттарын ұстанады. Тұтастай алғанда ҰҚШҰның жауапкершілік аймағы ұйымға мүше мемлекеттердің халықаралық танылған аумақтарымен нақты белгіленген және Ұжымдық қауіпсіздік осы аумақтар шегінде қамтамасыз етіледі. Сондықтан Ресей – Украина қақтығыс аймағына ҰҚШҰ-ның қатысуы мәселесі күн тәртібінде тұрған жоқ. Сондай-ақ, ЛХР, ДХР квазимемлекеттік аумақтарының, Украинаның Запорожье және Херсон облыстарын Ресейге қосу туралы өткен референдумдар бойынша Қазақстанның ұстанымы өзгерген жоқ. Бұл мәселеде Қазақстан халық- аралық құқық пен БҰҰ Жарғысына сәйкес мемлекеттердің аумақтық тұтастығы, олардың егемендік теңдігі және бейбіт өмір сүру қағидаттарын ұстанады. Біз Ресей мен Украина арасында саяси диалог орнатуға барынша дайын екенімізді тағы да растаймыз. Бұл ретте біздің еліміз жаһандық деңгейде тұрақтылықты сақтауды аса маңызды міндет деп санайды. Сондықтан біздің ұстанымымыз өзгерген жоқ», – деп кесіп айтты.