Шымкентте биыл 14 мың бала тегін спорттық үйірмелерге баруда. Бұл туралы @akimat_shymkent инстаграм парақшасында тікелей эфирде денешынықтыру және спорт басқармасының басшысы Бауыржан Тұманбаев мәлімдеді.
Балалардың спорттық әлеуетін арттыру мақсатында спорт үйірмелерін жүргізуге мемлекеттік тапсырыс берілуде. Осы тапсырыс аясында кәсіпкерлер спорттың 71 түрі бойынша қаржыландырылып, 4-18 жасқа дейінгі балалар өздерінің таңдауы бойынша спорт секцияларында тегін жаттығады. Қазіргі таңда мемлекеттік спорт тапсырысына 922 кәсіпкерден өтінім түсіп, біліктілік іріктеуінен соң 85 кәсіпкерге оң шешім берілген.
Кәсіпкерлердің басым бөлігі футбол, жүзу, таэквондо, каратэ, баскетбол және бокс спорт түрлеріне ұсыныс берген.
2022 жылы мемлекеттік тапсырысты іске асыруға жергілікті бюджеттен 2,3 млрд теңге қаралып, 14 мың баланы тегін спорттық секциямен қамту жоспарланып отыр. Жан басына қаржыландыру – спорт инфрақұрылымын дамытуға, салауатты өмір салтын белсенді насихаттауға және жаңа жұмыс орындарын құруға мүмкіндік береді.
