Таеквондо: Қыздарымыз Fajr Open турнирінде үшінші орын алды

      Қазақстан таеквондо федерациясының баспасөз қызметі: «Қазақстанның таеквондодан әйелдер құрамасы 32-і Fajr Open халықаралық турнирінің жеңімпаздары үштігіне енді», – деп хабарлайды. Қазақстан еншісінде бір күміс, бір қола медаль бар. Оларды құрама қоржынына салғандар – Жансель Дениз (73 келіге дейін) бен Әмина Нұрғазықызы (62 келіге дейін). Жарыстың екінші күні төрт спортшымыздың екеуі ширек финалға шықты: Мария Севостьянова (57 келіге дейін) мен Айгүл Елубай (73 келіден жоғары), бірақ екеуі де жартылай финал жолдамасын ала алған жоқ. Нәтижесінде Қазақстан құрамасы жалпыкомандалық есепте үшінші орынды иеленді. Бірінші орында Иран, екінші орында Өзбекстан спортшылары тұрақтады.